Қатар амири эронликларга визалар бериш тартиби соддалаштирилганини маълум қилди
Қатар амири Тамим бин Ҳамад Ол Соний 2022 йилда Қатарда бўлиб ўтадиган футбол бўйича Жаҳон чемпионатида эронлик мухлислар учун виза тартиби соддалаштирилганини маълум қилди.
Бугун Теҳронга бир кунлик ташриф билан келган Қатар амири Эрон биринчи вице-президенти Муҳаммад Моҳбер билан учрашувда Доҳа Теҳроннинг 2022 йилги футбол бўйича Жаҳон чемпионатини ўтказиш бўйича ҳамкорлик қилиш таклифини олқишлашини айтди.
Икки давлат ўртасидаги икки томонлама муносабатлар даражасига ишора қилган Моҳбер, Қатарнинг минтақавий ва ҳалқаро воқеалар, хусусан Эрон масаласидаги позициясини юқори баҳолади.
Эрон вице-президенти сионистик режим томонидан босиб олинган ҳудудларда “Ал-Жазира” телеканали журналистининг ўлдирилиши ҳақида гапирар экан, Қатарнинг Исроилга нисбатан позициясини ҳам олқишлади.
Мохбернинг қайд этишича, банк муносабатларининг ривожланиши Эрон ва Қатар ўртасидаги савдо алоқаларини соддалаштиришга олиб келади. Шунингдек, у минтақада тинчлик, барқарорлик ва хавфсизликни сақлаш учун икки томонлама ва минтақавий муносабатларни кенгайтиришга чақирди.
У Эрон ва Қатар ўртасидаги ҳамкорликнинг Яман ва Афғонистон каби давлатлардаги минтақавий инқирозларни ҳал қилишдаги ролига урғу берди.
Шунингдек, Эрон вице-президенти, икки давлат ўртасида ҳукуматнинг қўшма иқтисодий комиссияси тузилишини талаб қилди. Бундан ташқари, у Эрон Ислом Республикаси Қатар билан 2022 йилги футбол бўйича Жаҳон чемпионатини ўтказишда ҳамкорлик қилишга тайёрлигини билдирди.
