Президент энг кам ойлик иш ҳақини 1,5 баравар оширишни буюрди
Қозоғистон президенти Нурсултон Назарбоев 5 октябрь куни республика халқига берган йиллик ҳисоботида Қозоғистон фуқароларининг энг кам ойлик иш ҳақини 1,5 баравар оширишга ваъда берди.
Маълумотларга кўра, 2019 йилнинг 1 январидан энг кам ойлик иш ҳақи 76 доллардан 114 долларгача ортади.
“Бу ўсиш турли соҳаларда ишлайдиган 1,3 млн кишининг барча мулк шаклидаги корхоналардан оладиган иш ҳақига ҳам бирдек тегишли. Бундан ташқари, бюджет ташкилотларида фаолият юритаётган 275 минг нафар ходимнинг иш ҳақи ўртача 35 фоизга ошади. Бу ўқитувчилар, шифокорлар, ҳуқуқ-тартибот идоралари, мудофаа ва бошқа касб эгаларига тааллуқли. Мазкур мақсадлар учун йилига 261 млн 580 минг АҚШ доллари ажратилиши керак. Албатта, бу 2019-2021 йиллар учун республика бюджети ҳисобидан амалга оширилади", – дейди Н.Назарбоев.
Шунингдек, ҳукумат бошлиғи уч йил мобайнида фан ва таълимга ҳар йили 272 миллион 480 минг доллар ажратилишини белгилаб берди. Президентнинг таъкидлашича, ушбу соҳани ривожлантириш учун катта тажрибага эга бўлган, бу борада "сочи оқарган" шахсларни жалб этиш керак.
"Сингапур кўп йиллардан буён мутахассисларни излайди, сўнгра Япониядаги нафақахўрларни ишга жалб қилди. Мана, "Air Astana" ва Назарбоев университетини хорижликлар бошқаради. Сиз ҳам излаб топинг, маблағ тўланг. Агар ўзингиз ишламасангиз, мен ҳаммани ишдан бўшатаман, чет эллик фуқароларни ишлашга таклиф қиламан", – деди президент ҳукумат аъзолари ҳамда парламент депутатларига.
