Пелоси Озарбайжоннинг Арманистон суверенитети ва чегараларига ҳужумни қоралади
АҚШ Конгресси Вакиллар палатаси спикери Ненси Пелоси якшанба куни Ереванда Озарбайжоннинг Арманистон суверен ҳудуди ва чегараларига қилган ҳужумларини кескин қоралашини айтди.
Пелоси Арманистон парламенти спикери Ален Симонян билан учрашувда айтган бу баёнотидан маҳаллий оммавий ахборот воситалари иқтибос келтирмоқда.
Спикер, шунингдек, Арманистоннинг суверенитети ва ҳудудий яхлитлиги АҚШ учун муҳим эканини таъкидлади. Унинг аниқлик киритишича, Озарбайжоннинг Тоғли Қорабоғдаги тинч аҳоли ва тарихий обидаларга қарши вандализм ҳаракатлари Қўшма Штатларнинг диққат марказида бўлиб турибди.
“Биз Арманистон раҳбарияти билан нима қилишимиз мумкинлиги ҳақида гаплашиб олиш учун келдик”, деди Вакиллар палатаси спикери.
Шанба куни Арманистонга етиб келган Ненси Пелоси 19 сентябргача бу ерда қолиши кутилмоқда.
