Норвегияда коронавируснинг янги штамми аниқланди
Норвегияда коронавируснинг В.1.525 номли штамми аниқланди. Бу одатий COVID-19’дан анча хавфлироқ бўлиши мумкин, дея хабар берди NRK мамлакат Миллий жамоат соғлиқни сақлаш институти маълумотларига таяниб.
«Янги штамм ‘британча’ ва Жанубий Африкада тарқалган вариантларига анча яқин. У Норвегияда аниқланди», — дея хабар берган телекомпания.
Ахборотга кўра, Норвегиянинг ўзида охирги бир сутка ичида, тахминан, 10 та ҳолатда B.1.525 штамми билан зарарланишга дуч келинган.
«Биз ҳали штаммнинг янада зарарли ёки аксинча, нисбатан хавфсизлиги борасида аниқ маълумот айта олмаймиз, бироқ бунинг, яъни штамм зарарли эканлигининг эҳтимоли юқори», — дея институт бўлим бошлиғи Лине Волд сўзларини келтирган телеканал.
Олимнинг айтишича, Норвегияда коронавируснинг турли штаммлари аниқланган ва улар вақт ўтиши билан ўзгаришда давом этмоқда.
Бошқа мамлакатларда штаммлар диагностикаси борасида аниқ маълумотлар йўқ ва бундай вариантнинг мавжуд ё мавжуд эмаслиги хусусида ахборот берилмаган. Норвегия Буюк Британия, Дания ва Исландия билан биргаликда вируснинг янги штаммларини аниқлаш ва чуқур таҳлил қилиш юзасидан ишларни давом эттиради, дейилган институт баёнотида.
Норвегиялик мутахссисларнинг қайд этишича, бугунги кунда Ослодаги ҳар еттинчи касалланиш ҳолати «британча» штамм билан боғлиқ, бошқа коммуналарда, тахминан, 700 га яқин ҳолатда коронавируснинг мазкур тури тарқалгани аниқланган. Бундан ташқари 42 та вазиятда «африкача» штамми билан касалланиш қайд этилиб, олимлар касалликнинг мазкур турига қарши вакцинанинг ёрдам бериш ёки бермаслиги бўйича ҳали бир тўхтамга келгани йўқ.
2020 йил декабрь ойида Буюк Британия ҳукумати мамлакатда коронавируснинг янги, юқумлироқ тури аниқланганини эълон қилганди. «Британча» штаммнинг ўлимга олиб келиш эҳтимоли юқорироқ, шунингдек, у одатий шаклга қараганда тезроқ тарқалади.
Кўп мамлакатлар, шу жумладан, Россия ҳам Буюк Британияга парвозларни вақтинча тўхтатган. Россиялик вирусолог янги вариантнинг тез тарқалаётгани сабабли у аста-секин эски штамм ўрнини босишини айтган. Январь охирларига келиб, коронавируснинг янги штамми 60 га яқин мамлакатда қайд этилди.
Шунингдек, кейинчалик 2021 йил бошида АҚШда коронавируснинг «британча» ва «америкача» штамми бирлашувидан ҳосил бўлган гибрид тури аниқлангани, ЖССТ COVID-19’нинг янги штаммлари аниқланган мамлакатлар сони ортиб бораётганини қайд этгани, Финляндияда коронавируснинг Fin-796H деб номланган янги мутацияси аниқлангани хабар қилинган.
