Ноклар ичидан игналар чиқмоқда
Австралияда қулупнайлар ичига игна тиқишда гумон қилинган шахс қўлга олингандан бир неча кун ўтиб Мельбурн шаҳрида ичига игна тиқилган ноклар топила бошланди. Бу ҳақда ABC News телеканали хабар берди.
Аввалроқ Квинсленд штати полицияси қулупнай ичига игна тиқишда гумон қилиб 50 ёшли аёлни ҳибсга олганди. Штат пойтахти Брисбен шаҳар суди Ми Ут Тринь исмли гумонланувчи Berry Licious фермасида назоратчи бўлиб ишлагани ва қасддан ҳаракат қилгани ўрнатган.
Нокдаги игна эса ABC News Breakfast дастури визажисти Клэр Бонсер томонидан 13 ноябрда аниқланган. Аёлга жароҳат етмаган.
“Мен шунчаки нокни еяётганимда кейинги тишлам олдидан унга қарадим ва унда игнани кўрдим”, деб айтган аёл.
Бонсернинг айтишича, у нокни Мельбурндаги Woolworths супермаркетидан сотиб олган. У бу ҳақда супермаркетга хабар берган. Дўкон вакили бу ҳолат юзасидан тергов олиб борилаётганини маълум қилган.
Австралия полицияси мамлакатнинг камида еттита компанияси қулупнайларидан игна топилгани юзасидан тергов олиб борган. Кейинроқ игналар банан ва олмаларда топилган. Шундан кейин мутасадди идоралар меваларни истеъмол қилишдан олдин уларни кесиб кўришни тавсия қилган ҳамда бу ишни қилаётган жиноятчиларни топишга ёрдам учун 100 минг Австралия долллари (70 минг доллар) таклиф қилган.
