Ниқоб тақмай юрганларни жазолаш ваколати ИИВга ҳам берилади
Кеча бўлиб ўтган Сенат ялпи мажлисида пандемия қоидаларини бузганларни жазолаш ваколати ички ишлар органлари ходимларига ҳам берилишини кўзда тутувчи қонун маъқулланган.
Ижтимоий тармоқларда кўчада ниқоб тақмай юрганларни ИИВ ва миллий гвардия ходимлари ушлаб, жарима ёзишаётгани кўп муҳокамаларга сабаб бўлганди. Чунки бундай ҳолатда ички ишлар ходимлари уларни жазолаш ваколати эга эмасди. Бу ваколат фақат Санитария-эпидемиологик осойишталик ва жамоат саломатлиги хизмати ходимларида бор эди.
Энди эса Маъмурий жавобгарлик тўғрисидаги кодексда назарда тутилган эпидемияларга қарши кураш қоидаларини бузиш учун маъмурий жазо қўллаш ваколати ички ишлар органларига ҳам берилади.
Шунингдек, эпидемияларга қарши кураш қоидаларини бузиш билан боғлиқ ҳуқуқбузарликни содир этиб ҳаракатланаётган машиналарни ушлаб туриш тартиби ҳам жорий қилинмоқда.
Қонунни сенаторлар маъқуллашган. У президент имзолагач, кучга киради.
