Нидерландия АҚШда сақланаётган олтин захираларининг бир қисмини олиб чиқди

Нидерландия геосиёсий беқарорлик кучайиб бораётган бир шароитда АҚШда сақланаётган олтин захираларининг бир қисмини олиб чиқиб, Лондонга кўчирди. Бу ҳақда Tasnim News хабар берди.

Нидерландия Марказий банки (DNB) маълумотларига кўра, қарор олтин захираларини турли жойларда янада мувозанатли тақсимлаш ва эҳтимолий хатарларни диверсификация қилиш мақсадида қабул қилинган. Банк бу қадамни АҚШ президенти Дональд Трампнинг иқтисодий сиёсати билан бевосита боғламаган.

Маълумотларга кўра, Нидерландия Нью-Йорк ва Оттавада сақланган жами тахминан 86 тонна олтинни олиб чиққан. Илгари мамлакат олтин захираларининг 31 фоиздан ортиғи Нью-Йоркда сақланган бўлса, ҳозир бу кўрсаткич 18,5 фоизни ташкил этмоқда. Канадада ҳам сақланаётган олтин миқдори 19,7 фоиздан 18,5 фоизга камайган.

Айни пайтда Нидерландия олтин захираларининг 32 фоиздан сал кўпроғи Лондонда, қарийб 31 фоизи мамлакатнинг ўзида, 18,5 фоиздан қисми эса Нью-Йорк ва Оттавада сақланмоқда.

DNB таъкидлашича, Лондондаги Англия банки омборларида сақланаётган олтин халқаро савдо стандартларига мос бўлиб, жаҳондаги энг ликвид олтин активларидан бири ҳисобланади. Бу инқироз юзага келган тақдирда захираларга тезкор кириш имконини беради.

Сўнгги вақтларда Трампнинг АҚШ Федерал захира тизимига нисбатан танқидлари фонида АҚШда сақланаётган хорижий давлатларнинг олтин захиралари хавфсизлиги борасида хавотирлар ҳам кучайган. Бироқ Нидерландия Марказий банки ўз қарорини айнан шу омил билан изоҳламаган.

Шу билан бирга, Германиянинг олтин захираларини АҚШдан олиб чиқиш масаласи ҳам вақт-вақти билан муҳокама қилинмоқда. Германия Бундесбанки ҳозирча бундай қадам учун асос кўрмаётганини билдирган.

Бундесбанк тасарруфида қарийб 3350 тонна олтин мавжуд бўлиб, бу ҳажм бўйича Германия АҚШдан кейин дунёда иккинчи ўринда туради. Германия олтин захираларининг 51 фоизи Франкфуртда, қарийб 37 фоизи Нью-Йоркда ва 12 фоиздан сал кўпроғи Лондонда сақланади.