Нега танбеҳ бермай қўйдик?
Кўча-кўйда завқ билан ўйнаб юрган мактаб ўқувчиларини кўрсам, болалик пайтларим ёдимга тушади. Биз ҳам худди шундай эдик: дарслардан сўнг кўчага чиқиб ўртоқларимиз билан ўйинга шўнғиб кетардик. Болалик шуниси билан мароқли, шуниси билан ёқимли-да
Аммо ўйин ҳар қанча қизиб турган бўлмасин, кўча бошида бирор ўқитувчи келаётган бўлса, шошиб-пишиб уй-уйимизга тарқалардик. Чунки устоздан Нега дарс қилмай, бўлмағур ўйинлар ўйнаяпсизлар, вақтни беҳудага сарфламанг. Боринглар, уйдагиларга ёрдам беринг ёки дарсингизни қилинг , деган танбеҳ эшитишни хоҳламасдик. Қўрққанимиз учун эмас, ҳурмат қилганимиз учун шундай йўл тутардик.
Афсуски, айни пайтда устоз мартабаси олдингидек эмас. Буни ўқувчилар муносабатидан ҳам билса бўлади. Масалан, баъзида тўй ёки бошқа тантаналарда ўқувчи ўқитувчиси билан бемалол спиртли ичимлик ичиб ўтирганига кўзимиз тушади. Бунда ўша устознинг ҳам айби борлигини тан олмай илож йўқ. Айнан шуниси хавотирли аслида. Нега биз катталар, айниқса, устозлар ёшларга танбеҳ бермай қўйдик? Нима учун йигит-қизларимизнинг ножўя хатти-ҳаракатларини кўриб, кўрмасликка оляпмиз? Менинг фарзандим эмас-ку, менинг маҳалламданмас-ку қабилида иш тутиш оддий ҳолга айланиб қолди? Агар эътиборсизлик қилиб ўз вақтида танбеҳ бермасак, тўғри йўлдан адашган фарзандларимизнинг ўзини ҳақ деб ўйлашига шароит яратиб берган бўлмаймизми?
Шу ўринда Суюнчи фильмини бир эслайлик. Фильм бош қаҳрамони Анзират буви қишлоқдошларига, жумладан, ёшларга ҳам дакки бериб, уларнинг маънавияти, хулқ-атворидаги кемтикликни кўрсатиб беришга ҳаракат қилади ва бунга эришади ҳам. Албатта, ана шундай фидойи инсонлар орамизда, ён-атрофимизда жуда кўп. Улар ҳар қанча эътибору эҳтиромга лойиқ. Аммо минг афсуски, ўз масъулиятига лоқайд педагог лар ҳам бор. Фикримча, жамиятни гуруч ичидаги мана шундай курмаклардан тозалашнинг айни фурсати. Чунки ўқитувчи тарбия масаласига бепарво бўлса, бундан нафақат ўзи, балки бутун бошли жамиятга катта моддий ва маънавий зарар етиши ҳеч гап эмас. Зеро, бу касб эгалари инсон келажаги ва маънавий баркамоллигининг меъморидир.
Manba: azon.uz
