"НАТОнинг воввуллаши" Украина воқеаларига олиб келди - Рим папаси
Рим папаси Франциск айтишига кўра, НАТОнинг Россия чегаралари яқинида "воввулаши" Кремлни Украинада махсус операция бошлашига олиб келган.
НАТОнинг Россия чегаралари яқинидаги ҳаракатлари Украинада махсус операция бошланишига олиб келган бўлиши мумкин, деди Рим папаси Франциск Италиянинг Corriere della Sera нашрига.
"Эҳтимол, НАТОнинг Россия чегаралари яқинида воввуллаши Кремлнинг ана шундай реакциясига олиб келган. Унинг жаҳлини айнан нима чиқарганини айтиш қийин, лекин бу ҳам сабаблардан бири бўлган бўлиши керак", - деди Франциск.
Понтифик Украинага қурол етказиб бериш тўғрими-йўқми деган саволга жавоб беришга қийналди, лекин қуролланиш пойгасига қарши эканини билдирди.
"Урушлар биз ишлаб чиқарган қуролларимизни синовдан ўтказиш учун уюштирилади. Испаниядаги фуқаро уруши вақтида ҳам шундай бўлган, Сурия, Яман, Ироқ ва Африкада ҳам бирин-кетин урушлар бўлмоқда. Уларнинг барчасининг ортида халқаро манфаатлар турибди", - деди Франциск.
