Наримон Григоряннинг эҳтимолий қотили ушланди
Ҳуқуқ-тартибот идоралари ходимлари 14 январда ўлдириб кетилган таниқли дизайнер Наримон Григоряннинг эҳтимолий қотилини ушлашди.
Тошкент прокуратураси матбуот хизмати маълумотларига кўра, тезкор-қидирув тадбирлари натижасида қотилнинг шахсини ўрнатишга муваффақ бўлинган.
Айни вақтда гумонланувчи ҳибсга олинган. Унга Ўзбекистон Республикаси Жиноят кодексининг 97-моддаси (Қасддан одам ўлдириш) бўйича айблов билдирилган.
Марҳумнинг жасади у ижарада истиқомат қилиб келган Яшнобод тумани, Чигил кўчасидаги хонадоннинг меҳмонхонасидан қотиллик аломатлари билан топилган эди.
Наримон Григорян – Ўзбекистоннинг таниқли модельер ва кийим дизайнерларидан бири, Nariman Grigoryan бренди асосчиси. У 2018 йилда Vogue China журнали томонидан «Йил кашфиёти» номинациясида энг яхши дизайнер деб топилган. Шу йилнинг ўзида у Тошкентда ўз модалар уйини очган эди.
