Меркел Россиядан Навалнийни заҳарлаганларни жавобгарликка тортишни сўради
Германия канцлери Ангела Меркель Россия ҳукуматидан Алексей Навальнийни заҳарлаганларни топиб, уларни жавобгарликка тортишни сўради.
Владимир Путиннинг ашаддий танқидчиси бўлган Навальний ўтган ҳафтада оғир аҳволга тушган ва Сибирдаги касалхонага ётқизилганди. У даволаниш учун 22 август куни Германияга олиб кетилди.
Рус ҳукумати Навальнийнинг бу ҳолатга тушганига нима сабаб бўлгани номаълум эканлиги, дастлабки текширувларнинг натижаси у заҳарланмаганини кўрсатганини маълум қилганди.
Лекин, Берлиндаги Навальнийни даволаётган немис шифокорлари 24 августда Навальнийдан олинган таҳлиллар заҳарланиш белгиларини кўрсатганини таъкидлашди.
“Навальний Россиядаги таниқли сиёсий мухолиф бўлгани учун рус ҳукуматидан ушбу жиноятни охирги деталларигача ўрганиш ва бу текширувларни батамом шаффоф бўлиши сўралади. Бу ишни амага оширганлар аниқланиши ва жавобгарликка тортилиши шарт” дейди Меркель ўзининг баёнотида.
Берлиндаги Charite касалхонаси шифокорлари Навальнийни тўлиқ текширувдан ўтказишди ва уни заҳарланганини тасдиқлашди. Аммо, россиялик тиббиёт мутахассислари немис шифокорларининг бу ташхисларига қарши чиқишди ва у ўтган ҳафтада Омск касалхонасига олиб келнганда унда заҳарли моддалар аниқланмаганини таъкидлашган.
Алексей Навальний ўн йилдан кўпроқ муддатдан бери амалдаги ҳукуматни танқид қилади. У коррупцияга қарши намойишлар уюштиргани учун бир неча маротаба ҳибсга олинган. Шунингдек, у 2018 йилдан президентлик сайловларида иштирок этишдан ҳам маҳрум қилинган.
