Меркель "AstraZeneca" вакцинаси билан эмланиш учун рўйхатдан ўтмади

Германия канцлери Ангела Меркель илгари 11 апрель, якшанба кунига режалаштирилган коронавирусга қарши эмлаш учун рўйхатдан ўтишни бекор қилди. Бу ҳақда "Bild" нашри хабар бермоқда.

Бунга Германиядаги ҳукмрон партия — «Христиан-демократик иттифоқи» йиғилиши сабаб бўлган. Манбага кўра, канцлер ушбу тадбирда қатнашиши лозим эди.

Нашрнинг ёзишича, Меркель собиқ "Berlin-Tempelhof"  аэропорти ҳудудида ташкил этилган тиббий марказда эмланиши керак эди. У "AstraZeneca" (Буюк Британия-Швеция) компанияси вакцинаси билан эмланиши режалаштирилган эди.

Аввалроқ Меркель махсус тартибда коронавирусга қарши эмлашдан бош тортган эди.

30 март куни Германияда "Vaxzevria“ (”AstraZeneca") вакцинаси билан эмланганларнинг 30 нафардан ортиғида мияда тромбоз ҳосил бўлгани аниқлангани ва улардан тўққиз нафари ҳаётдан кўз юмгани маълум қилинган эди.

Аввалроқ, Германиянинг Роберт Кох институти қошидаги Эмлаш бўйича доимий комиссия (STIKO) "AstraZeneca“ вакцинасини қўллаш бўйича тавсияларини ўзгартирган эди. Унинг хулосасига кўра, препарат фақат 60 ёшдан ошганларга мўлжалланган. Комиссиянинг фикрига кўра, препарат камдан-кам ҳолларда эмлашдан кейин 4-16 кун ичида тромбоз ҳолатларига олиб келиши мумкин, асосан ушбу ёш чегарасидан паст бўлган беморларда. Шу боис 30 март куни Германияда ”AstraZeneca" вакцинаси фақат 60 ёшдан катта одамлар учун қўлланилиши маълум қилинди.