Маймунчечак вируси: яна оммавий эмлаш бошланадими?

ЖССТ вакили Ричард Пибодининг Reuters агентлигига маълум қилишича, Aфрикадан ташқарида маймунчечак эпидемияси шошилинч оммавий эмлашни талаб қилмайди.

Ташкилот шахсий гигиена касалликнинг тарқалишини назорат қилишга ёрдам беришини қайд этди.

“Энг муҳими, хавфсиз жинсий алоқа, яхши гигиена, мунтазам қўл ювиш. Буларнинг барчаси вирус тарқалишини чеклашга ёрдам беради”, деди у.

Пибодининг таъкидлашича, дарҳол қўлланилиши мумкин бўлган вакциналар ва вирусга қарши дориларни етказиб бериш чекланган. Контактларни кузатиш ва карантин эпидемияга қарши курашнинг асосий чоралари бўлиши керак.

Шунингдек, вирус “жуда осон” тарқалмаслиги ва айни дамда касалликнинг жиддий ҳолатларини келтириб чиқармагани хабар қилинган.

Олимлар ушбу касаллик атипик бўлган мамлакатларда инфекциянинг кўпайишига нима сабаб бўлганини аниқлашга ҳаракат қилмоқдалар. Шунингдек, нашрнинг ёзишича, мутахассисларда вирус мутацияга учраганлиги ҳақида ҳозирча далиллар йўқ.

ЖССТ ушбу касалликка қарши махсус эмлаш йўқлигини таъкидлайди, аммо чечакка қарши олдинги эмлаш самаралидир. Маймунчечак одатда ўз-ўзидан ўтиб кетадиган касаллик бўлиб, белгилари 14 дан 21 кунгача давом этади.

ЖССТ маълумотларига кўра, 12 мамлакатда инфекция ҳолатлари тасдиқланган.

Маймунчечак камдан-кам учрайдиган вирусли инфекция бўлиб, у одамлар орасида ҳам юқади. Бу одатда енгил ҳолат бўлиб, кўпчилик бир неча ҳафта ичида тузалиб кетади, аммо баъзиларида асоратлар пайдо бўлиши мумкин. Маймунчечакнинг дастлабки белгиларига иситма, бош оғриғи, мушак оғриғи, бел оғриғи, шишган лимфа тугунлари, титроқ ва чарчоқ киради. Тошма пайдо бўлиши мумкин, кўпинча юздан бошланади ва кейин тананинг бошқа қисмларига тарқалади. Тошма ўзгаради ва охир-оқибат қорақўтир ҳосил бўлишидан олдин турли босқичлардан ўтади, кейинчалик у тушади.