Марк Цукерберг узр сўради
Meta компаниясининг глобал масалалар бўйича директори Джоэл Каплан Ҳиндистон бош вазири Нарендра Модининг Facebook’даги пости вақтинчалик блоклангани учун узр сўради. Бу ҳақда Капланнинг Нью-Делида бўлиб ўтган Жанубий Осиё республикаси электроника ва ахборот технологиялари вазири Ашвини Вайшнав билан учрашуви якунларига таяниб, Ҳиндистоннинг ANI агентлиги хабар берди.
«Мен Meta номидан вазирга бош вазир Модининг пости чекланишига олиб келган хатолик учун узр сўрадим», — демоқда Капланнинг сўзларини ANI.
Бундан ташқари, Ҳиндистон ҳукуматидаги манбаларнинг маълум қилишича, Meta раҳбари Марк Цукерберг ҳам Модининг пости вақтинчалик ўчириб ташлангани учун узр сўраган. Уларнинг маълумотларига кўра, учрашув давомида Америка корпорацияси вакиллари ўзларига тегишли платформалар ишидаги камчиликларни тан олишган.
Хусусан, Meta раҳбарияти болаларга нисбатан жинсий зўравонлик акс этган материаллар ва дипфейклар тарқалиши билан боғлиқ муаммоларни тан олди, шунингдек, «муайян турдаги контентни илгари суриш учун катта миқдордаги маблағлар тўланганини» маълум қилди.
Аввалроқ Ҳиндистон Электроника ва ахборот технологиялари вазирлиги Meta’дан Модининг Facebook’даги пости блокланиши билан боғлиқ ҳодиса тафсилотларига изоҳ бериш, шунингдек, компания сиёсати ва юз берган воқеанинг техник сабабларини муҳокама қилиш учун ўз вакилларини юборишни талаб қилган эди. Модининг имтиҳон саволлари сизиб чиқишига қарши кураш чораларига бағишланган видеоролиги 23 июль куни эълон қилинган ва 28 июль куни вақтинчалик блокланиб қолган эди.
