Маккада намозхонлар учун ижтимоий масофа бекор қилинди

Арабистонининг Макка шаҳрида жойлашган дунёдаги энг йирик масжид — Ал-Ҳаромда 17 октябрь, якшанба куни пандемия бошидан буён биринчи марта ижтимоий масофа чораларига риоя қилмаган ҳолда намоз ўқилди. Бу ҳақда «Интерфакс» хабар бермоқда.

Ғарб ОАВлари ёзишича, Ал-Ҳаром ишчилари тўла-тўкис ибодатларни қайта тиклаш ҳақидаги қарорга мувофиқ, масжид полида ижтимоий масофа сақлашга ёрдам берадиган махсус стикерларни олиб ташлаган.

Матбуотда тарқалган видео ва фототасвирларга қараганда, 17 октябрь куни масжид намоз ўқувчилар билан максимал даражада тўлган. Саудия ОАВлари қайд этишича, энди чоралар бекор қилинганидан кейин Макка Умра сафари учун келадиган чет элликларни қабул қилади.

Шу билан бирга, ОАВлар Саудия Арабистони ҳукуматига таяниб таъкидлашича, масжидга келувчилар COVID-19 га қарши тўлиқ эмланган бўлиши ва унинг ҳудудида ниқоб тақиши шарт. Бундан ташқари, ташриф буюрувчилар учун Каъбага кириш ҳамон чекланган ҳолда қолмоқда.

Саудия Арабистони сўнгги ойларда аста-секинлик билан нормал ҳаётга қайтмоқда. 1 августдан қироллик коронавирусга қарши тўлиқ эмланган сайёҳларни қабул қила бошлади. Шунингдек, 17 октябрдан эмланган спорт мухлислари мамлакатнинг барча ўйингоҳларида ва бошқа спорт объектларида спорт тадбирларига кириши мумкин.

Аввалроқ Саудия Арабистони ҳукумати чет элликлар кичик ҳаж — Умра зиёратини амалга ошириш учун 10 августдан қиролликка кириши мумкинлигини эълон қилган эди.