Маданият ва туризм вазирлиги «Ёш вокал ижрочилари» республика кўрик-танловини эълон қилди

Маданият ва туризм вазирлиги 2023 йилнинг 25 февраль – 1 март кунлари «Ёш вокал ижрочилари» республика кўрик-танловини эълон қилди.

Танловда болалар ва санъат мактаблари ўқитувчилари, ихтисослаштирилган санъат ва маданият мактаблари, мактаб-интернатлар, мусиқа ва санъат коллежлари, олий таълим муассасаларининг талабалари, ўқитувчилари, бадиий ва ижодий жамоаларнинг ижрочилари (1-гуруҳ 16-22 ёш, 2-гуруҳ 22-32 ёш) иштирок этиши мумкин. Мақсад Ўзбекистон Республикаси Президентининг «Опера ва балет санъатини янада ривожлантириш чора-тадбирлари тўғрисида» 2021 йил 27 декабрдаги ПҚ-64-сон қарори ижросини таъминлаш ҳамда опера санъатини янада юксалтириш, опера санъати ижрочиларининг маҳорати, истеъдоди ва қобилиятини намоён этиш, уларнинг ижрочилик кўникмаларини янада ривожлантириш, миллий санъатимизни дунё саҳналарига олиб чиқиш, иқтидорли ёшларни рағбатлантириш ҳамда уларнинг ижодини кенг тарғиб қилиш, опера санъати ижрочилигининг ижро имкониятларини ошириш ва уларнинг ўзига хос хусусиятлари билан оммани таништиришдир.

Танловда иштирок этишни истаган ижрочилар 2023 йил 20 февралга қадар Алишер Навоий номидаги Ўзбекистон давлат академик катта театрига қуйидаги ҳужжатларни тақдим этишлари лозим:

– танловда иштирок этиш учун маълумотнома (резюме);
– 3х4 см ўлчамдаги 2 та ва 9х12 см ўлчамдаги 2 та рангли фотосурат;
– танловда иштирок этиш учун ижро дастури.

Иштирокчиларнинг танлов давомидаги ижро этиш навбати белгиланган тартибда қуръа ташлаш орқали аниқланади ва ушбу тартиб танлов якунига қадар сақлаб қолинади.

Асарлар ёддан ижро этилади. Барча асарлар нуфузли ҳайъат аъзолари томонидан кўриб чиқилади. Танлов саралаш ва якуний (финал) босқичдан иборат бўлади.

Саралаш босқичи:

Роялда ижро. Бунда 3 та асар ижро этилиши керак.
1. Ўзбек композиторлари романси.
2. Рус ёки Европа композиторлари операларидан ария (ХIХ-ХХ аср).
3. Романс (иштирокчи танловига кўра).

Якуний (финал) босқич:

Финалга саралаш босқичининг умумий натижаларига кўра, 12 та ижрочи саралаб олинади. Бунда 2 та асар симфоник оркестр жўрлигида ижро этилади:
1. Ўзбек композиторлари операларидан ария.
2. Рус ёки Европа композиторлари операларидан ария (ХIХ-ХХ аср).

Танлов иштирокчилари қуйидаги мезонларга асосан баҳоланади:
– ижро маҳорати;
– профессионал тайёргарлиги;
– репертуар савияси;
– саҳна маданияти ва артистик маҳорати.

Танловнинг саралаш ва якуний босқичларида иштирокчиларнинг ижро маҳорати ҳакамлар ҳайъатининг ҳар бир аъзоси томонидан алоҳида тарзда баллик тизими бўйича баҳоланади.

Танловнинг саралаш босқичида умумий балл натижаларига кўра энг юқори балл тўплаган иштирокчилар ҳакамлар ҳайъати қарорига асосан танловнинг якуний (финал) босқичига ўтказилади.

Ҳакамлар ҳайъати томонидан иштирокчиларга қўйилган баллар тенг бўлиб қолганда, ҳакамлар ҳайъати раисининг овози ҳал қилувчи ҳисобланади.
Танловда энг кўп умумий балл тўплаган иштирокчилар орасидан ҳакамлар ҳайъати қарорига асосан танловнинг Гран-при, 1, 2, 3-ўрин совриндорлари аниқланади.

Иштирокчиларни баҳолашда ҳакамлар ҳайъати мустақилдир.

Танлов ғолиблари махсус диплом, тегишли миқдорларда пул мукофотлари билан тақдирланади ҳамда танловнинг Гран-при ва 1-ўрин ғолиблари (олий таълим муассасалари талабалари ва ўқитувчиларидан ташқари) мос таълим йўналишлари бўйича тегишли давлат олий таълим муассасаларининг бакалавриат қабул квотасига қўшимча давлат гранти асосида ўқишга қабул қилинади.

Танлов иштирокчиларининг танлов ўтказилиши белгиланган ҳудудга келиб-кетиш, меҳмонхона ва овқатланиш харажатлари ўз маблағлари ёки юбораётган ташкилотнинг маблағлари ёхуд жисмоний ва юридик шахсларнинг ҳомийлик хайриялари ҳисобидан қопланади.

Манзил: Тошкент шаҳри, Миробод тумани, Зарафшон кўчаси, 28-уй.
Алишер Навоий номидаги Ўзбекистон давлат академик катта театри

Мурожаат учун: (71) 233-56-09, (90)-992-64-15