Лукашенко кўп овоз олди, халқ эса унинг истеъфога чиқишини истамоқда

Беларусда кеча, 9 август куни президентлик сайлови бўлиб ўтди. Марказий сайлов комиссияси томонидан эълон қилинган дастлабки натижаларга кўра, Лукашенко 81 фоиз, Тихановская эса 8 фоиз овоз олган.

Аммо беларусликлар бундай натижадан норози бўлиб, кўчаларда намойишлар ўтказмоқда.

Беларусда интернет билан боғлиқ чекловлар пайдо бўлди, ОАВларнинг сайтлари блокланиб қолди, Телеграм ва Viber каби сервислар ҳам жуда ёмон ишлаяпти, аҳоли VPNдан фойдаланмоқда.

Аҳоли ва ҳарбийлар ўртасида тўқнашувлар кузатилмоқда. Портлаш ва ўқ овозлари эшитилган, ҳарбийлар намойишни тарқатиш учун кўзни ёшлантирувчи газ ва сув пуркагичлардан фойдаланмоқда, айрим жойларда аҳолини калтакламоқда. Интернетда ушбу тўқнашувлар жараёнида вафот этганлар борлиги ҳақида хабарлар тарқалди.

Айрим жойларда аҳоли жўр бўлиб ҳарбийларга қарата «Халқни ҳимоя қил» дея бақирмоқда.

Ижтимоий тармоқларда тарқаган видеолардан кўринадики, Кобрин шаҳрида ҳарбийлар аҳолига қарши бормаслик учун қуроллари ва қалқонларини туширган, бу эса аҳоли томонидан олқишлар билан кутиб олинган, ҳатто одамлар қуролини туширган ҳарбийларни қучоқлаб, раҳмат айтишган.

Сайловларда 2-ўринни олгани айтилаётган Светлана Тихановская милиция ва ҳарбийларга мурожаат қилиб, куч ишлатмасликни илтимос қилди: «Мен милиция ва ҳарбийларга улар ҳам халқнинг бир бўлаги эканлигини эслатмоқчиман. Шунингдек, сайловчиларимдан ҳам илтимос - провокацияни тўхтатинг, сизга нисбатан куч ишлатиш учун сабаб қолдирманг.  Биламан, беларусликлар эртага янги давлат уйғонади ва умид қиламанки, эртага фақат яхши янгиликлар бўлади. Илтимос, зўравонликни бас қилинг. Офицерлар, биламан, бу қўлингиздан келади», деди у.

Ҳозирга келиб, намойишлар анча тинчиган, фаоллик камайган, одамлар уйларига тарқалган.

Беларусдаги сайловнинг якуний натижалари 14 август куни эълон қилиниши кутилмоқда.