Лицензиясидан маҳрум бўлган Жаҳонгир Отажонов жамоатчилик томонидан қўллаб-қувватланмоқда
«Ўзбекконцерт» давлат муассасаси томонидан 14 октябрдан эътиборан Жаҳонгир Отажоновнинг лицензияси тугатилгани ҳақида хабар берилган эди.
Лицензиясидан маҳрум бўлган хонанда жамоатчилик томонидан қўллаб-қувватланмоқда. Хусусан, Президент администрацияси ҳузуридаги Ахборот ва оммавий коммуникациялар агентлиги директори Комил Алламжонов санъаткорни қўллаб-қувватлаб, «Жаҳонгир Отажоновнинг қўшиқларини оилам ва фарзандларим билан яхши кўриб тинглайверамиз! Бунинг учун шахсан бизга лицензия керак эмас!», — деб ёзган агентлик раҳбари.
Жамоат арбоби Азиза Умарова «Ким тингловчиларнинг ўрнига кимни эшитиш ҳақида қарор қабул қилиш ҳуқуқига эга?», — деб субъектив цензурага нисбатан муносабатини билдирган ва дунёда «Ўзбекконцерт»га ўхшаган бошқа ташкилот йўқ эканлигини айтган. У ташкилотни тугатишни ва хонандалар ижодини баҳолашни томошабинларнинг ўзига қўйиб беришни таклиф қилган.
Тадбиркор Зафар Ҳошимов вазиятга изоҳ бериб, «Санъат ва истеъдод лицензия билан берилмайди ва олинмайди. Санъаткорнинг мақоми маъмурий мезонлар билан ўлчанмайди», — деб таъкидлаган.
«Ўзбекконцерт» хабарида лицензиянинг тугатилишига бир қатор сабаблар келтирилиб, Жаҳонгир Отажонов сўнгги вақтларда ижодкор шахс сифатидаги масъулиятини унутиб қўйгани айтилган.
