Кубада нефть омборида юз берган ёнғинни ўчириш ишлари ҳамон давом этмоқда
Шанба куни Кубанинг Матансас провинциясидаги портда жойлашган нефть омборида кучли ёнғин рўй берди.
Ёнғинни ўчириш учун катта куч жалб қилинмоқда. Хабарда келтирилишича, якшанба куни Мексика ҳарбий ҳаво кучларига қарашли биринчи самолёт ёнғинни ўчириш учун оролга кетиб келган.
Cubadebate порталининг ёзишича, самолётда 60 нафар ҳарбий хизматчи ва 16 нафар Pemex нефтгаз компанияси ишчилари бор. Бундан ташқари, Мексикадан яна учта вертолёт ҳамда Венесуэладан бир самолёт етиб келади.
Ёнғинга 25 минг кубметр нефть сақланаётган резервуарга яшин келиб урилиши сабаб бўлган. Ёнғин ўчирувчиларнинг ҳар қанча ҳаракатига қарамай, аланга қўшни резервуарларга ҳам ўтган ва бир нечта портлашлар қайд этилган. Ёнғин ўчириш ишлари бир суткадан буён давом этмоқда.
Маҳаллий ҳукуматнинг хабар беришича, ёнғин оқибатида бир киши ҳалок бўлган, 17 киши бедарак кетган. Ҳалокатдан жабр кўрганлар сони 120 киши бўлиб, уларнинг 36 нафари касалхонада даволанмоқда. Беш кишининг аҳволи жуда оғир, дейилади хабарда.
