Криштиану Роналду «Ювентус»да қолади
Турли миш-мишларга қарамай, «Ювентус» ҳужумчиси Криштиану Роналду клубда қолади, дея ёзмоқда Tuttosport.
Манбанинг хабар беришича, 35 ёшли португалиялик футболчи келажагини Туринда кўрмоқда ва яқин орада муҳитни ўзгартирмоқчи эмас. Клуб пандемия шароитида ҳам футболчи билан хайрлашмоқчи эмас. Криштиану голлар ва ғалабалар орқали рекордларни янгилашда, мавсум якунига кўра эса «Олтин бутса»ни қўлга киритишни режалаштирган.
Аввалроқ, футболчининг ёзги трансфер ойнасида Италияни тарк этмоқчи бўлаётгани, унга «Челси» клуби қизиқиш билдиргани ҳақида хабарлар тарқалганди.
Ушбу мавсумда 35 ёшли Роналду қора ва оқ футболкада 29 та ўйинда 25 та гол урди ва 3 та голли узатмани амалга оширди.
Маълумот учун, Роналду 2018 йилда «Реал»дан 117 миллион евро эвазига «Ювентус» сафига келиб қўшилган эди. Футболчининг амалдаги шартномаси 2022 йилгача имзоланган.
