Коронавирус! Тошкентда 10 нафар беморнинг аҳволи оғир
Тошкент шаҳридаги икки касалхонада коронавирусдан даволанаётган беморларнинг жами 10 нафари оғир аҳволда. Бу ҳақда Санитария-эпидемиология назорати давлат инспекцияси бошлиғи Нурмат Отабеков «Ўзбекистон 24» телеканалидаги чиқишида маълум қилди.
Ўзбекистоннинг давлат бош санитария инспектори Нурмат Отабековнинг маълум қилишича, 8 апрель соат 10:00 ҳолатига кўра Тошкентдаги Вирусология илмий-текшириш институти клиникасида 98 киши даволанмоқда, уларнинг 25 нафарида пневмония белгилари кузатилмоқда, етти нафар беморнинг аҳволи оғир.
Шунингдек, Эпидемиология, микробиология ва юқумли касалликлар илмий-текшириш институти клиникасига 69 нафар бемор жойлаштирилган бўлиб, улардан уч нафарининг аҳволи оғир. Қайд этилишича, Ўзбекистоннинг бошқа ҳудудларида ҳам коронавирусга чалинган беморлар даволанмоқда.
Аввалроқ 6 апрель куни Ўзбекистон соғлиқни сақлаш вазири Алишер Шодмонов аҳволи ўта оғир бўлган икки бемор сунъий нафас олиш аппаратига улаб қўйилганини маълум қилган эди.
