Кетма-кет рекорд: Россия нефтининг Ҳиндистонга экспорти яна ошди

Россия Ҳиндистонга энг йирик нефть етказиб берувчи бўлиб қолмоқда ва етказиб бериш ҳажми ўсишда давом этмоқда. Бу ҳақда Kpler таҳлилий компаниясига таяниб The Independent хабар бермоқда.

Дастлабки ҳисоб-китобларга кўра, ноябрь ойида Россия нефтининг Ҳиндистонга экспорти ҳажми кунига 1,03 миллион баррелга етган — бу янги рекорддир.

Kplerнинг етакчи нефть таҳлилчиси Мэтт Смитнинг фикрича, бу декабрда ҳам Россия Ҳиндистоннинг энг йирик нефть етказиб берувчисига айланиши мумкин. Шундай қилиб, Россия бу кўрсаткич бўйича ўз етакчилигини кетма-кет уч ой сақлаб қолади.

Ҳиндистон ҳукумати вакиллари мамлакат Ғарб давлатларининг Россия нефти нархини чеклаш бўйича қарорини қўллаб-қувватлаш ниятида эмаслигини аниқ билдирган.