Канье Уэстнинг хинкалига ўхшашлиги учун мазах қилиб келинган кроссовкалари бир дақиқа ичида сотилиб кетди
Рэпер Канье Уэстнинг шахсий бренди томонидан яратилган янги оёқ кийимлар бир дақиқадан камроқ вақт ичида сотилиб кетди, деб хабар беради Page Six.
Гап ижтимоий тармоқларда кенг кулгиларга сабаб бўлган 450 Cloud White оқ кроссовкалари ҳақида кетмоқда. Мазкур оёқ кийим оқ-кул ранг енгил тўрли материалдан тайёрланган ва боғичларга эга. Таъкидланишича, кроссовка Adidas ва YeezySuppley.com сайтида сотувга чиқиши билан марка ихлосмандлари буюртмаларни амалга ошира бошлаган.
Оёқ кийимнинг дастлабки нархи 200 долларни ташкил этади, бироқ иккиламчи бозорда унинг нархи 900 доллардан ошиб кетган.
Twitter фойдаланувчилари кроссовкаларнинг «яшин тезлигида» сотилишини муҳокама қилишга киришган. «Yeezy 450’нинг чиқиши бемаънигарчилик бўлди. 15 дақиқа ‘кутиш залидасан’, кроссовкалар бутунлай харид қилиб бўлинмагунича саҳифа ўз-ўзидан янгиланади», «Релиз соат 07:00 да бўлди, барча нусхалар 07:01 да сотиб бўлинди. Одамлар ушбу оёқ кийимни йил давомида ёмон кўрди, бироқ Yeezy 450 чиққан кундаги каби кўп энергияни ҳеч қачон кўрсатмаган», — деб ёзади улар.
Аввалроқ Yeezy ўргимчакка ўхшаш шиппак ишлаб чиқаргани, янги модель мультфильм қаҳрамонлари пойабзалини эсга солиши тўғрисида хабар берилганди.
