Жек Ма Хитойнинг энг бой одамлари рейтингида биринчи ўринни эгаллади

Интернет-савдо бўйича дунё етакчиси бўлмиш Alibaba асосчиси 56 ёшли Жек Ма 2020 йилда Хитойнинг энг бой одамлари рейтингида биринчи ўринни эгаллади.

Бу ҳақда Hurun (Forbes’нинг Хитодаги аналоги) нашри веб-сайтида эълон қилинган ҳисоботда маълум қилинди.

Унга кўра, рейтинг тузувчилар Жек Манинг бойлигини 58,8 миллиард долларга баҳолашган.

Иккинчи ўринни бойлиги 57,4 миллиард долларни ташкил этган Tencent телекоммуникацион компанияси директорлар кенгашининг 49 ёшли раиси Ма Хуатэн забт этган.

Nongfu бренди остида ичимлик суви ишлаб чиқарувчиси 66 ёшли Чжан Шаньшань эса 53,7 миллиард доллар бойлиги билан кучли учликка якун ясаган.

«Бу йил Hurun нашрининг 22 йиллик тарихи давомида Хитойнинг энг бой одамлари рейтингида энг катта бойлик ўсиши қайд этилди. Фонд бозоридаги кескин ўсиш ва қимматли қоғозларнинг кўпайиши натижасида сўнгги бир йил ичида Хитойда ҳар ҳафта бешта янги долларли миллиардер пайдо бўлди. Дунё аввал бир йил ичида бундай бойлик яратилишини кўрмаган», дейди ушбу тадқиқотлар асосчиси Руперт Хоогеверф.

Таъкидланишича, бу йил хитойлик миллиардерлар рўйхати 257 кишига ортган ва ҳозирда Hurun маълумотларига кўра, 878 кишини ташкил этади.

Уларнинг қарийб ярми Пекин, Шэньчжэн, Шанхай, Ханчжоу, Гуанчжоу ва Сучжоу шаҳарларида истиқомат қилади.