Италияда Исроил билан ўйинга қарши норозилик акцияси бўлиб ўтди

Италиянинг Удине шаҳрида 2026 йилги жаҳон чемпионати саралаш босқичи доирасидаги Италия ва Исроил терма жамоалари ўртасидаги ўйин бошланишига бир неча соат қолганида минглаб одамлар норозилик намойиши ўтказди.

Шаҳар марказида фаоллар “Фаластинга озодлик”, “Исроилни бойкот қил” каби шиорлар билан чиқишган оммавий намойиш бўлиб ўтди. Иштирокчилар Фаластин байроқлари ва “Исроилга қизил карточкани кўрсатинг” ёзуви туширилган плакатларни кўтариб, Исроил терма жамоасини Ғазода содир этган жиноятлари учун халқаро спорт мусобақаларидан четлатишни талаб қилишди.

Айрим маршчилар Исроилнинг Ғазо секторига уюштирган ҳужумларида ҳалок бўлган 18 мингдан ортиқ боланинг исмлари ёзилган 23 метр узунликдаги рамзий кафанни кўтариб юришди.

Намойишчилардан бири — Андреа исмли италиялик фаол Anadolu агентлигига берген интервьюсида, апартеид ва геноцидни ўзида мужассам этган давлатга қарши ўйин ўтказишни номақбул деб ҳисоблашини билдирди.
“Бу 7 октябрдан бошланмади; фаластинликларга, хусусан, Ғазода геноцид йиллар давомида амалга оширилмоқда”, — деди у.

Андреа, шунингдек, ўйиннинг ўтказилиши Исроил сиёсатини қонунийлаштиришини таъкидлади:
“Биз Исроилни барча спорт мусобақаларидан, айниқса FIFA ва UEFA турнирларидан четлатишни талаб қиламиз”.

Яна бир италиялик фаол “Исроилга қизил карточкани кўрсат” акциясини қўллаб-қувватлаб, “Фаластин озод бўлгунга қадар” намойишлар давом этишини таъкидлади.

Акция иштирокчиларидан бири Марконинг айтишича, фаоллар “ҳурмат ва инсоний меҳр” рамзи сифатида ҳалок бўлган болаларнинг исмлари ёзилган кафанни олиб келган.
“Камситувчи сиёсат олиб бораётган давлат спорт мусобақаларида қатнашмаслиги керак. 1960–1970-йилларда Жанубий Африка Олимпиададан четлатилганидек, Исроил ҳам четда қолиши лозим. Бу адолат ва демократия йўлидаги муҳим қадам бўлар эди”, — деди у.

Республика майдонидан Первомай майдонигача бўлган юриш якунлангач, айрим намойишчилар ўйин бўлаётган “Bluenergy” стадионига етиб боришга уринди. Полиция оммани тарқатиш учун кўздан ёш оқизувчи газ ва сув пуркагичлардан фойдаланди. Бир неча намойишчи ҳибсга олинди, ANSA агентлиги маълумотига кўра, бир журналист бошидан жароҳат олган.

Италия матбуоти хабарига кўра, кучайтирилган хавфсизлик чоралари остида ўтган ўйинни 25 минг томошабиндан 8 мингга яқини томоша қилган. Миллий мадҳиялар вақтида айрим италиялик мухлислар Исроил мадҳиясини куйлашган, бошқалар эса қарсаклар билан жавоб беришган.

Шунингдек, Удине, Рим ва Милан каби бошқа шаҳарларда ҳам Исроилни халқаро спорт мусобақаларидан четлатиш талаби билан норозилик намойишлари бўлиб ўтгани хабар қилинган.

Италия матбуоти таъкидлашича, ўйин вақтида снайперлар, сапёрлар ва Исроилнинг “Моссад” махсус хизмати вакиллари жойлаштирилган бўлиб, бу ҳолат мухолифат доираларида қаттиқ танқидга сабаб бўлган.