“International Experience" хусусий бандлик агентлигига берилган лицензия тўхтатилди
“International Experience xususiy bandlik agentligi” МЧЖга Ўзбекистон Республикасидан ташқарида иш излаётган шахсларни ишга жойлаштириш фаолияти билан шуғулланиш учун берилган лицензиянинг амал қилиши вақтинчалик тўхтатилди.
Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигига “International Experience xususiy bandlik agentligi” МЧЖ фаолияти устидан кўплаб фуқаролардан шикоят аризалари келиб тушган. Мазкур агентлик фуқароларни Германия, Чехия, Литва давлатларига ишга жойлаш учун улардан 50 минг АҚШ долларидан зиёд пул олган, бироқ шартнома шартларини бажармаган.
Шу муносабат билан, Бандлик ва меҳнат муносабатлари вазирлиги Ўзбекистон Республикаси Вазирлар Маҳкамасининг 2018 йил 12 сентябрдаги 725-сонли қарори билан тасдиқланган “Ўзбекистон Республикасидан ташқарида иш излаётган шахсларни ишга жойлаштириш бўйича фаолиятни лицензиялаш тартиби тўғрисида”ги Низомининг 45-бандига мувофиқ, “International Experience xususiy bandlik agentligi” МЧЖ лицензиясининг амал қилиши 10 иш куни муддатига тўхтатилганлиги тўғрисида қарор қабул қилди.
Шу 10 кун давомида “International Experience xususiy bandlik agentligi” МЧЖ томонидан фуқаролар билан тузилган шартнома шартлари бажарилиши талаб этилади.
