Илгиз Танташевнинг Франция — Парагвай учрашувидаги ҳакамлиги халқаро нашрлар томонидан танқид қилинди

ЖЧ-2026 мусобақасининг 1/8 финалидан ўрин олган Франция — Парагвай (1:0) учрашувида ўзбекистонлик ҳакам Илгиз Танташевнинг ҳаракатлари халқаро спорт жамоатчилиги, хусусан, нуфузли нашрлар томонидан жиддий эътирозларга сабаб бўлмоқда.

5 июль куни АҚШдаги “Филаделфия” стадионида бўлиб ўтган учрашувда Парагвай вакиллари Францияга қарши ўта қўпол ўйин намойиш этди. Учрашув давомида Жанубий Америка вакиллари томонидан кўплаб кескин ҳаракатлар амалга оширилган бўлса-да, Илгиз Танташев парагвайлик футболчиларга бирорта ҳам сариқ карточка кўрсатмади.

Биринчи бўлим якунланишига 10 дақиқа қолганида Килиан Мбаппе ва парагвайлик Андрес Кубас ўртасида жиддий зиддият юзага келди. Тез орада бу ҳолатга ҳар икки жамоа футболчилари, хусусан, Усмон Дембеле ҳам келиб қўшилди. Шунингдек, парагвайлик Матиас Галярса тўпсиз ҳолатда турган Мбаппега қарши қўпол ҳаракат қилди. Такрорий лавҳаларда у франциялик ҳужумчининг қўлига зарба бергани кўринган. Бироқ ҳакам ушбу вазиятларнинг ҳеч бирида қоидабузарларни огоҳлантирмади.

Бунинг ўрнига, учрашув якунига яқин франциялик футболчилар — Ману Коне (81-дақиқа) ва Майкл Олисе (90+7-дақиқа) сариқ карточка билан жазоланди. Парагвайликлар эса ўйинни битта ҳам огоҳлантиришсиз якунлади.

Ўйиндаги ягона ва ҳал қилувчи гол 70-дақиқада киритилди. Захирадан майдонга тушган Дезире Дуэ жарима майдончасида йиқитилгач, Танташев дастлаб қоидабузарликни қайд этмади. Фақатгина VAR аралашуви ва монитордаги такрорий лавҳалардан сўнг пенальти белгиланди. Уни Мбаппе аниқ амалга ошириб, турнирдаги ўзининг 7-голини (Жаҳон чемпионатларидаги 19-голини) киритди.

Ҳакамлар фаолиятини таҳлил қилувчи нуфузли Archivo VAR портали Танташевнинг ушбу ўйиндаги ишини 10 баллик тизимда 1 баллга лойиқ кўриб, ҳолатни ЖЧ-2026 даги энг ёмон ҳакамлик деб атади:

“Ўзбекистонлик ҳакам мутлақо унутиши керак бўлган кун. Унинг ишида бирорта ҳам ижобий жиҳатни ажратиб кўрсатиш қийин. У кетма-кет хатоларга йўл қўйди ва шундоқ кўриниб турган сариқ карточкаларни кўрсатмади. Бунинг устига, иккинчи бўлимда Дуэга нисбатан ишланган аниқ пенальтини ҳам ўтказиб юборди ва VAR ҳакамни монитор ёнига чақиришга мажбур бўлди. Ўйинчилар ўртасидаги зиддиятли вазиятларда у ўзини худди ёш боладек тутди ва ўйиндаги кескинликни мутлақо назорат қила олмади”.

Британиянинг машҳур The Sun нашри ҳам учрашувдаги ҳакамлик қарорларини очиқчасига танқид қилди:

“Франция бу ўйинни имкон қадар тезроқ унутишни хоҳлайди. Парагвай ўзининг қўпол ўйинига қарамай, битта ҳам огоҳлантириш олмаганига ишониш қийин. Парагвайлик футболчилар доимий равишда ҳакамни ўраб олишди, у эса тушунарсиз сабабларга кўра уларнинг барча қўполликларига кўз юмди. Яхшиямки, французлар ушбу тартибсиз ўйиндан жароҳатларсиз омон чиқишди. Турнирда ўзини номардларча тутганларнинг омади чопмади”.

Маълумот ўрнида, ушбу қийин ғалабадан сўнг Франция миллий жамоаси чорак финалга йўлланма олди ва энди 10 июль куни ярим финал йўлланмаси учун Марокашга қарши баҳс олиб боради.