Гренландияликларнинг аксарияти АҚШга қўшилишга тайёр

American Patriot Polling агентлигининг сўнгги сўровига кўра, Гренландияликларнинг 57,3 фоизи Қўшма Штатларга қўшилиш ғоясини қўллаб-қувватлаган. Дональд Трамп томонидан илгари сурилган ташаббус Дания томонидан бошқариладиган Гренландия Қўшма Штатлар таркибига кириши мумкинлигини кўрсатади. Респондентларнинг 37,4 фоизи бунга қарши, яна 5,3 фоизи бир қарорга келмаган.
416 киши иштирок этган сўров Трамп Гренландиянинг АҚШга киритилиши "зарур" эканлигини айтганидан кейин ўтказилди. Бироқ, тадқиқот натижалари экспертларда шубҳа уйғотмоқда, чунки Patriot Polling агентлиги Республикачилар партияси билан боғлиқ ва унинг обрўси юқори баҳоланмаган.
Трамп Гренландияга даъволарини оролнинг стратегик аҳамияти билан асослайди. Унинг таъкидлашича, глобал исиш шароитида Гренландия янги ресурсларга, шунингдек, қитъалар орасидаги қисқароқ денгиз йўлларига йўл очмоқда.
Трамп ўз ғоясини илгари суриш учун ўғли кичик Дональд Трампни Гренландия пойтахти Нуук шаҳрига жўнатиб, у ерда маҳаллий аҳоли билан учрашди. Бироқ, кейинчалик маълум бўлишича, тадбир махсус ташкил этилган: МАГА қалпоқларини кийган иштирокчиларга қимматбаҳо ресторанда бепул тушлик таклиф қилинган.
Дания бош вазири Метте Фредериксен “Гренландия сотилмайди”, дея оролни сотиш ғоясини кескин рад этди. Кичик аҳолиси 56 865 киши бўлган Гренландия Дания Қироллигининг бир қисми бўлиб қолмоқда ва унинг АҚШ назоратига ўтиши Копенгагеннинг жиддий қаршиликларига сабаб бўлмоқда.