Германияда оммавий жанжал: 80 га яқин чечен ҳибсга олинди
Германиянинг Райнсберг шаҳрида оммавий муштлашув натижасида 60-80 га яқин чечен диаспораси вакиллари полиция томонидан ушланган. Бу ҳақда DW хабар бермоқда.
"Газета"га кўра, махсус операция 25 июль, шанбага ўтар кечаси шаҳар туманларидан бирида бир нечта чеченлар ва бир гуруҳ немислар ҳамда поляклар ўртасида жанжал бўлганидан кейин амалга оширилган. Жанжалда етти киши жароҳатланган, улардан иккитаси касалхонага ётқизилган. Шу билан бирга, можаронинг сабаби ҳозирча аниқланмаган.
Кейинги тартибсизликларнинг олдини олиш учун ҳуқуқ-тартибот идоралари ходимлари Марифредштрассе кўчаси ҳудудида операция ўтказиб, бир неча ўнлаб чеченларни ушлашган. Полиция уларнинг тафсилотларини ёзиб олганидан сўнг, чеченлар қўйиб юборилган. Бунгача жанжалда қатнашган беш немис ва уч полициячи ҳам ҳибсга олинган эди. Бироз вақт ўтгач, улар ҳам қўйиб юборилди.
Июнь ойи охирида Франция полицияси Дижон шаҳридаги тартибсизликларда иштирок этган чечен диаспораси аъзоларини ҳибсга олди, улар маҳаллий гиёҳванд моддалар савдогарларидан 16 ёшли чеченни шафқатсиз калтаклашгани учун қасос олишга қарор қилишганди. Маҳаллий ОAВ хабарларига кўра, 15 июнь куни Дижон кўчаларида 150дан ортиқ чеченистонликлар қасос олиш учун тўпланишган. Кўпчилик қуролланган эди. Ўшанда тўқнашувларда 11 киши жароҳат олгани, баъзиларининг аҳволи оғирлиги қайд этилди. Кейинчалик тўрт нафар ҳибсга олинганларга қарши айблов эълон қилинди.
