Германия Адлия вазири: "Шимолий оқим—2" ни қатъият билан қўллаб-қувватлаган ҳолда, Берлин Украинада уруш бошланишига ёрдам берди
Германия Адлия вазири Марко Бушманнинг сўзларига кўра, мамлакат 2014 йилда Қрим Россия томонидан аннексия қилинганидан сўнг "Шимолий оқим—2" лойиҳасида иштирок этишдан бош тортмай, Украинага қарши уруш бошланишига ҳисса қўшган.
"Биз Украина томонида бирлашганмиз. Лекин шуни ҳам аниқ айтишимиз керак. Қримнинг аннексия қилинишига жавобан, "Шимолий оқим—2" бўйича мажбурият, бугунги нуқтаи назардан қараганда, Германиянинг уруш бошланишига қўшган ҳиссаси эди", — деди Бушман кечаги G7 мамлакатлари адлия вазирлари йиғилишида.
Германия федерал ҳукумати "Шимолий оқим—2" газ қувурини сертификатлаштириш жараёнини 2022 йил февраль ойида, Россия босқинининг бошланишидан фақатгина икки кун олдин тўхтатган.
Бу Россиянинг Украина шарқида 2014 йилдан бери босиб олган ҳудудлар мустақиллигини тан олишига муносабат эди.
