G7 очарчиликка қарши кураш учун 4,5 миллиард доллар ажратади
G7 етакчилари ривожланаётган мамлакатларда очарчиликнинг олдини олиш учун 4,5 миллиард доллар ажратишга қарор қилди, деб хабар бермоқда Reuters .
Украинадаги можаро туфайли бутун дунёда озиқ-овқат ва энергия нархлари кескин ошиб кетди. G7 глобал озиқ-овқат хавфсизлигини яхшилаш учун маблағ ажратади, бу маблағнинг катта қисмини АҚШ таъминлайди. Пул 47 мамлакатда очликка қарши кураш ва минтақавий ташкилотларни молиялаштиришга сарфланади.
“Биз, Катта еттилик етакчилари, глобал озиқ-овқат хавфсизлигини яхшилаш ва озиқ-овқат инқирози жиддий зарар кўриши мумкин бўлган энг заиф одамларни ҳимоя қилиш учун барча саъй-ҳаракатларимизни қиламиз”, — деди G7 мамлакатлари етакчилари Баварияда бўлиб ўтган саммитда.
G7 давлатлари, шунингдек, аллақачон ошиб бораётган инфляцияни қўзғатмасдан, Россияга иқтисодий босимни кучайтирмоқчи.
