Франция — “сариқ нимчалилар”: Норозилик намойишидан келишувгача
Парижда 8 декабрь ҳолатига кўра, ҳибсга олинган намойишчилар сони 1,5 минг нафардан ошган.
Бу хақда euronews хабар тарқатмоқда.
Мамлакатнинг йирик шаҳарлари бўйлаб 30 мингга яқин аҳоли “сариқ нимчалилар” ҳаракати остида норозилик намойишларида иштирок этган.
Ҳаракатнинг энг фаол маркази мамлакат пойтахти Париж бўлиб, 8 мингдан ортиқ киши норозилик намойишларида қатнашгани кузатилган.
Франция ички ишлар вазири Кристоф Кастанернинг қайд этишича, ҳуқуқ-тартибот ишларида полициянинг фаол ҳаракати туфайли мамлакатда ўтган ҳафта кузатилган тартибсизликларни пасайтиришга эришилган.
“Норозилик намойишларининг кучайиши тўхтатилди. Намойишчиларнинг кўпчилиги ҳибсга олинди. Лекин бу ─ норозилик ҳаракатлари буткул бартараф этилди дегани эмас”, дейди ички ишлар вазири.
Ушбу ҳаракат аҳолининг ҳукумат сиёсий бошқарувидан кучли норозилигини кўрсатмоқда.
Мамлакат Бош вазири Эдуард Филипп намойишчиларга ҳукумат ва аҳоли ўртасида миллий мулоқотни бошлаш таклифи билан мурожаат этди.
“Биз мулоқот ва биргаликдаги муҳокамалар билан мамлакатда миллий бирликни тиклашимиз керак” , дейди Бош вазир.
Шунингдек, Эдуард Филипп нутқида мамлакат Президенти намойишчилар билан келишув мулоқотини амалга оширишини маълум қилган.
Мамлакат ИИВнинг маълумотларига кўра, 8 декабрь куни мамлакатда бўлиб ўтган намойишларни бартараф этиш жараёнларида 135 га яқин киши жабрланган. Улар орасида намойишчилар, журналистлар ва полиция ходимлари бор.
Manba: uza. uz
