Financial Times нашрини илк бор аёл киши бошқаради

Британиянинг 130 йилдан кўпроқ тарихга эга Financial Times (FT) газетасини илк бор аёл киши бошқаради. 

Нашрнинг маълум қилишича, унинг бош муҳаррири Лайонел Барбер ушбу лавозимни 14 йил эгаллагандан кейин 2020 йил январда истеъфога кетади. Барбер газетада умумий ҳисобда 34 йил ишлаган. У ўз лавозимидан кетишининг сабабини маълум қилмаган.

Барбернинг ўрнини ким эгаллаши ҳақидаги янгилик ўзини куттириб қўймади. Маълум қилинишича, бош муҳаррир лавозимини нашрда 24 йилдан бери фаолият юритиб келаётган, 2016 йилдан Барбернинг ўринбосари бўлган Рула Халаф эгаллайди. Бунгача Халаф хорижий мавзулардаги, жумладан Яқин Шарқ билан боғлиқ мақолаларга масъул бўлган.

1888 йилда ака-ука Горацио Вильям Боттомли ва Жеймс Шеридан томонидан асос солинган Financial Times нашри дунёнинг 24 та шаҳрида инглиз тилида 350 мингдан кўпроқ нусхада чоп этилди. Молия ва бизнес олами янгиликларини чоп этишга ихтисослашган газетанинг бош қароргоҳи Лондонда жойлашган.

Manba: kun. uz