Филиппинда жангчи хўроз лейтенантни ўлдирди!
Филиппиннинг Шимолий Самар провинциясида лейтенант жангчи хўроз ҳужуми натижасида вафот этди. Бу ҳақда Филиппиннинг PNA ахборот агентлиги хабар берди.
26 октябрь, душанба куни Сан-Хосе муниципалитет полицияси ходими Кристиан Болок ноқонуний хўроз уриштирилаётган бинони текширишга борди. Шу пайт оёғига пичоқчаси боғланган хўроз лейтенантнинг чап оёғига зарба бериб, унинг артерия томирига зарар етказди. Лейтенант касалхонага олиб борилди, аммо кўп қон йўқотганлиги сабабли вафот этди.
Рейд давомида полиция хўроз уриштириш билан шуғулланган уч кишини ҳибсга олди ва етти жанговар хўрозни тортиб олди. Шунингдек, патрул хизмати ходимлари қочиб кетган яна уч гумонланувчини аниқладилар.
Хўроз уриштириш — бу Филиппин аҳолиси орасида жуда машҳур бўлган қимор ўйини. Иштирокчилар ўткир металл пичоқчалар билан қуролланган иккита махсус ўргатилган хўрозлар жанги натижаларига гаровлар тикадилар. Пандемия пайтида ҳукумат хўроз жангларини ташкил қилишни тақиқлаган.
