Фермер хўжаликлари экин ер майдонларини эгаллаб олиш ҳолатлари аниқланди

Бош прокуратура ҳузуридаги Департаментнинг Музработ туман бўлими томонидан ўтказилган терговга қадар текширувда, фуқаро Н.А. “Ф.Х.” фермер хўжалигининг суғориладиган экин ер майдонининг 20 сотихини ўзбошимчалик билан эгаллаб олиб, жами 98 метр кв. сувли ер майдонида 5 хонали уй-жой қурилишини амалга ошираётганлиги аниқланган.

Шу каби, Департаментнинг Шофиркон туман бўлими томонидан ўтказилган терговга қадар текширувда, фуқаро М.О. "Жўйрабод” МФЙдаги “R.J.” фермер хўжалигига қарашли юқори бонитетли суғориладиган ер майдонининг 7 сотихини ўзбошимчалик билан эгаллаб олиб, ернинг унумдор қатламига зарар етказган ҳолда чорвага мўлжалланган бино қурганлиги аниқланган.

Мазкур ҳолатлар юзасидан Жиноят кодексининг 229-1-моддаси (ер участкаларини ўзбошимчалик билан эгаллаб олиш) билан жиноят ишлари қўзғатилиб, тергов ҳаракатлари ўтказилмоқда.