Фабио Каннаваро: “Жисмоний тайёргарликда камчилик бор, аммо Жаҳон чемпионатигача вақтимиз етарли”

Уругвайга қарши ўртоқлик учрашувидан сўнг Ўзбекистон миллий терма жамоаси бош мураббийи Фабио Каннаваро матбуот анжуманида қатнашиб, журналистларнинг саволларига жавоб берди.

“Афсуски, бугунги ўйинда 9 нафар футболчимиз жароҳат сабаб майдонга чиқа олмади. Мавжуд таркибдаги футболчиларни кўриб чиқиш ва уларни синовдан ўтказиш мен учун муҳим эди. Йигитларнинг ҳаракатидан мамнунман. Улар бугун борини берди. Икки кун олдин Малязияга етиб келганимиз боис дам олишга имкон бўлмади”, деди Фабио Каннаваро.

Шунингдек, италиялик мутахассис Русланбек Жияновнинг Уругвай дарвозасига киритган голи ҳақида ҳам тўхталди:

“Бундай ўйинларда гол уриш муҳим. Эҳтимол, ҳисобни олдинроқ очишимиз ҳам мумкин эди. Яхши вазиятларга эга бўлдик. Футболчилар тўпсиз ҳам яхши имкониятлар яратди. Уругвай каби жамоага қарши ўйнаш осон эмас. Сабаби уларнинг кўпчилиги Бразилия чемпионатида ҳаракат қилади. Жамоамиз яхши, уни кучайтириш имкони бор. Бьелса сингари мутахассисдан ижобий фикр эшитганимдан хурсандман. У футбол тарихида ўз ўрнига эга мураббийлардан бири. Ундан ўрганадиган жиҳатларим кўп”.

Ўзбекистон терма жамоаси устози футболчиларнинг жисмоний ҳолати ҳамда ноябрь ойидаги ўйинлар ҳақида гапирди:

“Ҳа, жисмоний жиҳатдан орқадамиз — бунга қўшиламан. Аммо буни тузатиш учун 8 ой вақтимиз бор. Бу фақат машғулот эмас, балки овқатланиш, уйқу, тикланиш каби омилларга ҳам боғлиқ. Жаҳон чемпионатига аста-секин тайёргарлик кўрамиз. Мураккаб турнир бўлиши аниқ. Ноябрь ойида Дубайда икки ўйин ўтказилиши режалаштирилганини эшитдим. Ўша вақтгача Ўзбекистонда қолиб, чемпионат ўйинларини кузатаман, мураббийлар билан танишаман”.

Фабио Каннаваро ўтказиб юборилган голлар ҳақида ҳам алоҳида тўхталди:

“Биринчи гол офсайддан киритилди, иккинчисида эса рақибга кўп ҳудуд бўшатиб бердик. Ҳимояда бир-биримизга яқин ўйнашимиз керак. Диққат ва эътибор жуда муҳим. Танаффусда футболчиларга иккинчи бўлимнинг илк 15 дақиқаси ҳал қилувчи бўлишини айтдим. Бугун эътибор етишмагани оқибатини кўрдик. Иккинчи бўлимда айрим футболчиларнинг руҳий ҳолати паст эди. Захирадан тушганлар эса майдонга яхши кайфиятда чиқди. Ўйин охирида босимни ошириб, гол урдик. Жамоага келганимдан бери барча футболчилар борини бериб ўйнаяпти — бу мени қувонтиради”.

Маълумот учун, Ўзбекистон терма жамоаси Малайзияда Уругвайга қарши баҳс олиб бориб, 1:2 ҳисобида имкониятни бой берди. “Оқ бўрилар”нинг ўйиндаги ягона голига Русланбек Жиянов муаллифлик қилди.