Эйфель минорасининг бир бўлаги 275 минг еврога сотилди

Париждаги аукционда 1 декабрь куни Эйфель минорасининг бир бўлаги сотувга қўйилди.

Artcurial кимошди уйининг маълум қилишича, лот 275 минг еврога сотилган, деб хабар берди «Korrespondent.net».

Минора бўлаги исмини ошкор қилмаган европалик коллекционер томонидан сотувга қўйилган. Унинг бошланғич нархи 30 минг еврони ташкил этган.

Маълумотларга кўра, сотувга қўйилган лотнинг баландлиги 3 метр бўлиб, у авваллари Эйфель минорасининг иккинчи ва учинчи қаватини бирлаштириб турган спиралсимон зинанинг бир қисми бўлган.

Эслатиб ўтамиз, 2016 йилда америкалик харидорга Эйфель зинасининг тўққизта поғонаси сотилган эди. Ўшанда унинг нархи 550 минг долларни ташкил этганди.