Европаликлар ХОҚнинг Россия ва Беларус спортчиларига нисбатан санкцияларни юмшатиш қарорига қарши чиқмоқда

Reuters агентлигининг хабар беришича, ЕИнинг тўққизта аъзо давлати Европа спорт комиссари Гленн Микаллефга йўллаган хатида Россия ва Беларус спортчиларини қайта иштирок этишига рухсат берган спорт ташкилотларини, жумладан, Халқаро олимпия қўмитаси (ХОҚ), Бутунжаҳон сузиш федерацияси ва Халқаро қиличбозлик федерациясини молиялаштиришни тўхтатишга чақирди.

Хатни Эстония, Дания, Финляндия, Латвия, Литва, Нидерландия, Полша, Руминия ва Швеция имзолаган. Халқаро олимпия қўмитаси ўз қарорини ҳимоя қилмоқда. У ерда таъкидлашларича, санкцияларнинг бекор қилиниши вақтинчалик характерга эга ва бу ташкилотнинг Россияга нисбатан позициясининг кенг кўламли ўзгарганини англатмайди.

"ХОҚ мураккаб воқеликда ва жорий геосиёсий вазиятнинг оқибатларини ҳисобга олган ҳолда йўл топишга мажбур", — дейди қўмита вакили.

Матбуот котибининг қўшимча қилишича, ХОҚ Россияда мусобақалар ўтказмайди ва россиялик давлат расмийларини ўз тадбирларига таклиф қилмайди. Бўлажак Олимпия ўйинларида Россия байроғи, ранглари ёки мадҳиясидан фойдаланиш бўйича ҳали қарор қабул қилинмаган.