Эрдўған Қора денгизда катта газ кони топилганини эълон қилди
«Қора денгизда 135 миллиард кубометр бўлган янги табиий газ захиралари топилди»,деди Туркия президенти Ражаб Тоййиб Эрдўған.
«Фатиҳ бурғулаш кемаси янги Амасра 1 конида 135 миллиард кубометрдан ортиқ газ тўпланишини аниқлади», – дея Эрдўғаннинг сўзларини келтиради РИА Новости нашри.
Унга кўра, ҳозирда Туркия томонидан Қора денгизда топилган табиий газ захиралари ҳажми 540 миллиард кубометрга етади.
2023 йилга келиб расмийлар уни ички бозорга етказиб беришни бошлашни кутмоқдалар. Яқин келажакда, расмийлар ушбу кондан газ қазиб олиш билан боғлиқ техник масалаларни ҳал қилади ва зудлик билан бурғулаш ишларини бошлайди, деб ёзади ТАСС нашриёти ўз саҳифаларида.
Айни пайтда, ўтган йилнинг октябрь ойи ўрталарида Эрдўған «Сакаря конининг Дунай 1 қисмида аниқланган газ захиралари ҳажми 405 миллиард кубометрни ташкил этганини» айтди.
Аввалроқ, Эрдўған Қора денгизда 85 миллиард кубометр янги табиий газ захиралари топилганлигини эълон қилганди.
Ўтган йилнинг август ойи охирида Эрдўған Туркиянинг бурғилаш кемаси Қора денгизда 320 миллиард кубометрга тенг йирик газ конини топгани ҳақида хабар берган эди.
