Эрдўған ислом мегабанки очишни таклиф қилди
Анқара ислом дунёсида ҳамкорликни мустаҳкамлаш тарафдори. Бу ҳақда Туркия президенти Ражаб Тоййиб Эрдўған Саккизта ривожланаётган мусулмонлар мамлакатлар иқтисодий ҳамкорлик ташкилоти раҳбарларининг 10-саммитида айтиб ўтди.
Туркия президенти «мусулмон давлатлар саккизлиги» давр талаблари асосида такомиллашиб бориши кераклигини айтди.
«Бизнинг ташкилот лойиҳаларни амалга ошириш ва аниқ мақсадларга эришишга йўналтирилган тузилишга айланиши керак. Қарорларни қабул қилиш жараёнини тезлаштириш учун чоралар кўришимиз зарур», – деди у.
Президент Эрдўған фаолияти ислом молия институтлари ликвидлигини таъминлашга ҳамда мусулмон мамлакатларда инфратузилма лойиҳаларини амалга оширишга қаратиладиган ислом мегабанкини очиш таклифини билдирди. «Ушбу мегабанк онлайн платформада иш олиб бориши ва ислом дунёсининг ўсиб бораётган молиявий эҳтиёжларини қоплаши мумкин», – деди Туркия раҳбари.
Шунингдек, Эрдўған «мусулмон давлатлар саккизлиги»ни зулм ва қашшоқликка қарши курашаётган Фаластин, Аракан, Яман ва суриялик қочқинларни қўллаб-қувватлашга чақирди.
«Мусулмон давлатлар саккизлиги» 1997 йил 15 июнда ташкил этилган. Унга Бангладеш, Миср, Индонезия, Эрон, Малайзия, Нигерия, Покистон ва Туркия аъзо.
