Электр нархи ошиши арафасида Наманган шаҳрида тўлов учун турнақатор навбатлар юзага келмоқда
Электр энергияси нархи ошиши арафасида Наманган шаҳрида тўлов учун узундан-узоқ навбатлар юзага келмоқда. Фуқаролар аввал электр пулини тўлаш, кейин уни смарт-картага юклаш учун соатлаб навбат кутмоқда, дея хабар беради «Turon 24».
«Эрталаб соат 8:00 да келганман. Мана, ҳозир соат 14:00 дан ошди. Ҳали ишим битмади. Электр корхонаси олдидаги пул қабул қилиш шохобчасида навбатни кўриб, сабрим чидамай, «Paynet»да пул ўтказиб келдим, — дейди фуқаро Мажидхон Юсуфбоев. — 100 минг сўм тўлов учун 5 минг сўм олиб қолиб, 95 минг сўмга чек беришди. Энди буни cмарт-картамга юклаб олиш учун ҳалигача навбат кутяпман. Инновация, янги технологиялар деймиз, қани улар? Шунча аҳоли наҳот битта қурилмага қараб қолса?"
Шаҳарнинг «Ғунча» маҳалласида яшовчи Билолхон Маҳмуджоновнинг айтишича, тонг саҳарлаб, соат 7:40да навбатга турган. Соат 8:00 дан кейин ходимлар келиб, қурилма ишламаётгани айтганидан сўнг қайтиб кетган ва тушликдан сўнг келган. Энди эса 50 нафарга яқин мижоз қатори сабр қилишга мажбур.
«Муаммо томони шундаки, баъзан ҳисоблагич пул қабул қилмай қолади. Ҳозир уни ҳам «нол» қилиб, кўрсатгани олиб келдим, – дейди Билолхон Маҳмуджонов. — Ҳар гал ўртача 50 минг сўм тўлов қиламан. Бугун ҳисоблагичнинг муаммосини ҳал қилиш ва пулни юклаш учун кун бўйи сарсон бўляпман».
«Пул тўлаш учун 70-80 чоғли одам навбатда турибмиз. Орасида бизга ўхшаган ёши катталар, аёллар бор. Баъзилар вақти бўлмагани учун болаларини чиқарган, — дейди ўзини Абдурашид Икромов деб таништирган фуқаро. – Яна бир томони, гоҳида тўлов учун пластик карталар қабул қилинмайди. Картасини кўтариб шунча навбатда турган одамнинг бу «янгилик»ни эшитганидан кейинги ҳолатини тасаввур қилаверинг».
Ушбу муаммо юзага келаётган Наманган шаҳридаги «Марказ» электр тармоқлари корхонаси бош муҳандиси Иномжон Абдуллаевга кўра, корхона идорасида тўлов қабул қилинмайди, бу ерда фақат «Саноатқурилишбанк» шохобчаси жойлашган, холос. Идора атрофидаги 2 та тўлов қабул қилиш шохобчаси эса хусусий тадбиркорларга тегишли. Лекин мижозлар шу ерни ишончли ва тўлов дарров тушади деб ҳисоблагани учун уларнинг оқими тўхтамаяпти.«Аслида исталган банк ва почта филиалларида тўловни амалга оширса бўлади. Қабул қилинган пул дарров бизда ва МИБда кўринади. Корхонамиз 60 минг мижозга хизмат кўрсатади, бундан 57,5 минги аҳоли, қолгани юридик шахслар. Тўловни смарт-картага юклаш талаб қилинадиган ҳисоблагичлар 14 мингга яқин хонадонга ўрнатилган, — дейди Иномжон Абдуллаев. — Ҳозирда автоматлаштирилган электр ҳисоблагичлар ўрнатишни бошладик, уларда тўловни онлайн тарзда амалга ошириш имконияти мавжуд. Янги қурилаётган биноларнинг барчаси шундай қурилмалар билан жиҳозланяпти, бундай хонадонлар сони 4 мингга яқинлашиб қолди. 2020 йилгача бу жараён якунланиши керак».Бош муҳандиснинг қайд этишича, мижозларнинг асаббузарлигига сабаб бўлаётган смарт-карталарга тўловларни юклаб берадиган қурилма марказда атиги битта. Свет ўчиб қолса, унинг ҳам дастури ишдан чиқади ва то созлагунча бир муддат вақт кетади. Қолаверса, 10 минг маротаба карта кириб-чиққанидан сўнг қурилма яроқсиз ҳолга келади ва уни Тошкент шаҳрига бориб янгилаб келиш керак.Вилоят электр энергиясига масъул мутасаддилар тўловларни амалга оширишда кузатилаётган турнақатор навбатларни электр энергияси нархи ошиши арафасидаги ажиотаж билан боғламоқда. Улар тўловни юклаш қурилмаси билан боғлиқ муаммолар вақтинчалик, янги автоматлаштирилган электр ҳисоблагичлар ўрнатилганидан сўнг ўз-ўзидан ҳал бўладиган ҳолат дея изоҳламоқда. Бироқ улар ишга тушгунча 14 мингга яқин хонадон смарт-карта орқали тўлов қилишга мажбур.Маълумот учун, 2018-йил 16-ноябрдан электр энергиясининг 1 киловатти 250 сўмгача (ҳозир 228 сўм 60 тийин) ошади. 2019 йил 1 июнидан эса яна бир марта — 280 сўмгача кўтарилади. Бу Вазирлар Маҳкамасининг 2018 йил 1 ноябрь куни қабул қилинган “Ёқилғи-энергетика ресурслари нархларининг ва тарифларининг босқичма-босқич ўзгариши тўғрисида” қарорида кўзда тутилган.
Manba: daryo.uz
