Эквадор президени Ассанж Лондондаги элчихонани хавфсиз тарк этиши мумкинлигини айтди
WikiLeaks асосчиси, 2012 йилдан бери Эквадорнинг Лондондаги элчихонасида қолаётган Жулиан Ассанж элчихона биносини ҳаёти учун хавф-хатарсиз тарк этиб, Британия суди олдида жавоб бериши мумкин. Бу ҳақда журналистлар билан суҳбатда Эквадор президенти Ленин Морено маълум қилди.
“Бизга Британия ҳукуматининг расмий хабарини жўнатишди, унда мамлакат конституцияси инсонни ҳаёти учун хавф мавжуд бўлган жойга экстрадиция қилишни тақиқлаши айтилган”, деб таъкидлаб ўтган Морено. Унинг айтишича, ушбу хабар Кито ва Лондоннинг музокаралари доирасида олинган. Эквадор Британиядан Ассанж ўлим жазоси амал қилувчи давлатга топширилмаслиги бўйича кафолат берилишини сўраган.
“Шу тариқа жаноб Ассанжнинг элчихонадан озодликка чиқиш борасида қарор қабул қилиши учун йўл очилди. У Британия судига бормаганини унутмайлик ва шу сабабли бироз муддат турмада ўтказишига тўғри келади. Буни Британия суди ҳал қилади”, деб қўшимча қилган Морено.
Шу билан бирга Эквадор президенти Ассанжнинг элчихонада қолаётганига салбий муносабатда эканлигини айтган. “Менга жаноб Ассанжнинг элчихонада қолаётгани ёқмаяпти, бироқ биз унинг ҳуқуқларига ҳурмат билан муносабатда бўлдик ва фикримча, 6 йил бу узоқ муддат, у элчихона биносида деярли қамоқдагидек ўтирибди”, деб айтган Морено.
Ассанж Швецияга экстрадиция қилинишидан қочишга уриниб, элчихонаси биносида 2012 йилдан бери қолмоқда. Ассанж Швеция уни АҚШга депортация қилишидан хавфсираган. У ерда эса австралияликка АҚШ давлат департаменти махфий ҳужжатларини чоп этгани учун 35 йиллик қамоқ ёки ўлим жазоси берилиши мумкин.
Ассанж ўзига билдирилаётган айбловларни рад этмоқда ва уни сиёсий уюштирилган деб атамоқда. 2017 йилда унга қарши Швецияда очилган иш ёпилган, бироқ Британия Ассанж судга келмагани сабаб ҳибсга олиниши керак, деб ҳисобламоқда.
Manba: kun. uz
