Даҳшат! Тошкентда аёл ўз синглисини ўлдириш учун бошқа бир аёлни ёллади

Даҳшат! Тошкентда аёл ўз синглисини ўлдириш учун бошқа бир аёлни ёллади

Тошкентнинг Юнусобод туманида ўз синглисини ўлдириш учун 5 минг долларга қотил ёллаган аёлга суд ҳукми ўқилди. Бу ҳақда «Darakchi.uz» хабар берди.

Маълум қилинишича, 2010 йилда Гулсара Ражабова Намангандан Тошкентда яшовчи опаси Ҳалима Ражабова уйига келган. Улар «Абу Сахий» бозорида совун ва хўжалик маҳсулотларини сотиш билан шуғулланган ва биргаликда жамғарган пулига 2012 йилда Юнусобод туманидан хонадон сотиб олган. 2019 йилгача улар аҳил яшаган. Ҳалима Ражабова уларга тегишли юкларни айтилган жойдан олиб келиб, бозорга етказиб бериш билан шуғулланган Зоир исмли шахс билан танишиб қолиб, муносабатлари чуқурлашгач, опа-сингил ўртасида ўзаро келишмовчиликлар юзага келган.

Муаммонинг ечимини синглисини қасддан ўлдириш деб ҳисоблаган опа буни 5 минг доллар эвазига муқаддам қасддан одам ўлдириш жиноятини содир этиб, жазо муддатини ўтаб чиққан таниши Холида Сафарова орқали амалга оширмоқчи бўлган, аммо режаси амалга ошмаган.

Холида Сафарова содир этиш учун таклиф этилаётган бу жиноятнинг оқибати жуда оғир ва қийин эканлигини айтганидан сўнг, Ҳалима Ражабова ундан ушбу қотилликни амалга оширишда бошқа шахсни топиб беришни илтимос қилган. Жазо муддатини ўтаб чиққан аёл бу ҳақда таниши Вазира Эгамовага айтган ва улар ўзаро маслаҳатлашиб, сингилнинг ҳаётини сақлаб қолиш мақсадида режалаштирилаётган жиноий ҳаракат ҳамда унга нисбатан қонуний чора кўришни сўраб, Юнусобод туман ИИО ФМБга ариза билан мурожаат қилган.

«Судланувчи Ражабова Ҳалима туғишган опам бўлади. Шу пайтгача иккаламиз бир уйда аҳил ва иноқ яшаб келаётгандик. Опам Зоир билан танишиб, учрашишни бошлаганидан кейин батамом ўзгарди. У бизга бегона одамга айланди. Оилали эркак билан учрашиб юриши, уйга келмай қолиши менга ёқмади. Унга бўй етган қизи борлигини, бу иши нотўғрилигини тушунтирмоқчи бўлдим. Зоирга ҳам бу ҳақда гапирдим. Аммо улар ўз билганларидан қолишмади. Менинг бор айбим шу», — деган судда жабрланувчи сифатида сўралган Гулсара Ражабова ва опасини кечирганини, унга нисбатан даъвоси йўқлигини айтиб, жазо тайинлашда енгиллик беришни сўраган.

Синглисини ўлдирмоқчи бўлган Ҳалима Ражабова Жиноят кодексининг 25 (жиноятга тайёргарлик кўриш ва жиноят содир этишга суиқасд қилиш), 97-моддасининг 1-қисми (қасддан одам ўлдириш) билан жиноят содир этганликда айбдор деб топилиб, унга нисбатан Жиноят кодексининг 57-моддаси (енгилроқ жазо тайинлаш)ни қўллаб, 8 йил муддатга озодликдан маҳрум қилиш жазоси тайинланган.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!