Буюк Британияда 17 майдан бошлаб вакцинация паспортлари жорий этилади
17 майдан бошлаб хорижга сафарга отланаётган британияликлар учун вакцинация паспортлари жорий этилади. Бу ҳақда The Times газетаси хабар берди.
Хабарда айтилишича, смартфон ва планшетлар учун илова кўринишидаги ушбу паспортлар миллий соғлиқни сақлаш хизмати (NHS) томонидан берилади.
Паспортлар фақат вакцинанинг икки дозасини олган британияликларгагина берилиши кўзда тутилган. Хоҳловчилар 119 рақамига қўнғироқ қилиб эмланганлигини тасдиқловчи қоғоз гувоҳнома олишлари мумкин. Хориж сафарига отланган британияликлар вакцинация паспортига эга бўлиши шарт.
Иловадан фойдаланиш учун фуқаролар хорижга чиқишдан камида икки ҳафта олдин рўйхатдан ўтиши лозим.
Ҳозирга қадар катта ёшли британияликларнинг 67 фоизи (35,5 млн киши) коронавирусга қарши вакцинанинг биринчи дозаси билан, 34 фоизи (17,9 млн киши) эса ҳар икки дозаси билан эмланган.
