БухДУ га 500 АҚШ доллари эвазига ишга жойлаштириб қўймоқчи бўлган аёлнинг кирдикорлари фош бўлди

Бухоро шаҳридаги мактаблардан бирида меҳнат қилаётган шахс яхшироқ маошни кўзлаб Бухоро давлат университетига ишга жойлашмоқчи бўлади. Бир таниши орқали «Гулноз Гулямова» деган аёлнинг телефон рақамини олди. Ўз навбатида Г. Гулямова «холис» хизмати учун 500 АҚШ доллари сўрайди.

Аёл 400 доллар миқдоридаги нақд пулни бериб, тютерлик лавозимига ишга жойлаштирганидан сўнг қолган 100 АҚШ долларини беришини айтади. Шундан кейин сайтга ўзининг паспорт ва диплом нусхаларининг электрон шаклларини тютерликка ишга қабул қилиниши учун жойлаштирди. Аммо ушбу сайт орқали иш стажи икки йилдан кам бўлганлиги сабабли тютерликка қабул қилинмаслиги тўғрисида жавоб келди. Ишга кира олмаслигига кўзи етган аёл Г. Гулямовадан пулни қайтаришни сўради. Фирибгар аёл эса узоқ ваъдалардан сўнг ниҳоят пулни бир таниши орқали етказаётган паллада жиноий қилмиши ҳуқуқни муҳофаза қилиш идораси ходимлари томонидан фош этилди.

Жиноят ишлари бўйича Бухоро шаҳар судида мазкур жиноий иш атрофлича кўриб чиқилди.Судья Н. Шаропов раислигида ўтказилган судда Гулноз Гулямовага икки йил 6 ой муддатга озодликни чеклаш жазоси тайинлади.