Таниқли инсайдер Мин-Чи Куо Apple’нинг эгилувчан экранга эга смартфони яқин бир—икки йил ичида пайдо бўлмаслигини маълум қилди. Таъкидланишича, компания бу турдаги қурилма анонсини 2023 йилга режалаштирмоқда, деб хабар беради Hi-Tech.Mail.ru.

Инсайдернинг сўзларига кўра, букланувчан iPhone диагонали 7,5—8 дюймга тенг дисплейга эга бўлади. Шу сабабли ўлчами жиҳатидан у iPad Mini планшети каби бўлади.

Ҳозирда Apple эгилувчан дисплейларга оид муаммони ечиш устида иш олиб бормоқда — афтидан, гап замонавий букланувчан смартфонларда кузатилаётган букланиш жойидаги бурмалар ҳақида кетмоқда. Galaxy Z Fold 2’да ушбу бурмалар биринчи Galaxy Fold’дан кўра кўзга ташланмайди.

Шунингдек, катта ҳажмдаги букланадиган смартфонни чиқариш учун оммавий ишлаб чиқаришни бошлаш керак. Ишлаб чиқаришни йўлга қўйиш орқали технология нархи ҳам арзонлашиши керак, ҳозирда Galaxy Z Fold 2 «классик» флагманлардан анча қиммат. Миш-мишларга кўра, Apple Samsung билан ҳамкорлик қилмоқда ва ундан биринчи прототиплар учун эгилувчан дисплейларни буюртма қилмоқда.