Бугундан тест синовлари юзасидан апелляция бериш бошланди

Бугундан тест синовлари юзасидан апелляция бериш бошланди

Гарчи ҳали якуний мандат эълон қилинмаган бўлса-да, лекин Низом бўйича бугундан апелляция жараёнлари бошланади. Аслида апелляция бериш учун абитуриент ўзининг балини билса кифоя, якуний натижа шартмас. Аммо якуний натижалар чиққанда эди, абитуриентлар кирган-кирмаганлиги, бали етган-етмаганлигидан келиб чиқиб, апелляция бериш фикридан қайтарди. Ҳозирги ҳолат ДТМнинг ўзининг зарарига ишлайди. Ўшанчун Низомда апелляцияни аниқ санадан эмас, якуний жавоблар чиққан кундан бошланишини белгилаш керак, деб ёзмоқда блогер ва ҳуқуқшунос Хушнудбек Худойбердиев.

Апелляция тартиби қуйидагича:

? тест синовлари натижасидан норози бўлган абитуриентлар 21 августдан 30 августгача (белгиланган иш вақтига мувофиқ) апелляция комиссиясига апелляция шикоятини бериш ҳуқуқига эга;

? Низомда апелляция шикоятлари ёзма ёки электрон шаклда берилиши айтилган. Аммо электрон ариза беришнинг татиби йўқ, фақат ёзма (қоғозда) қабул қилишади. Шуни абитуриентларнинг шахсий кабинети ёки ДТМ сайти орқали йўлга қўйиш шунчалар қийинми?

? абитуриент хабарномада белгиланган кунда ўзининг паспорти ва абитуриент рухсатномаси билан келиши шарт;

? абитуриентга унинг жавоблар варақаси нусхаси, тест топшириқлари нотўғри бажарилган жавоблар рўйхати ҳамда тест топшириқлари китоби берилади;

? абитуриент ўзининг ҳар бир нотўғри деб ҳисобланган тест топшириғига жавобларини ёзма равишда баён қилади ва апелляция комиссиясига тақдим этади;

? апелляция шикояти фақат абитуриент иштирокида, унинг ёзма жавоблари асосида кўриб чиқилади. Илгари ота-онаси ёки устозларига рухсат бериларди, кейинчалик буни тақиқлаб қўйишди;

? абитуриентнинг ёзма жавоблари ўз тасдиғини топмаган бўлса, шикоятни рад этиш тўғрисида қарор қабул қилинади;

? абитуриент мурожаат қилганда унга қарордан кўчирма берилади;

? абитуриентнинг жавоблар варақаси, тест топшириқлари китоби ДТМга белгиланган тартибда етказилмаган, йиртилган бўлса, шунингдек, тест синовларидан четлаштирилган ёки ўзининг жавобларини ёзма равишда баён қилмаган абитуриентнинг апелляция шикояти кўриб чиқилмайди.

Шу жойида катта эътироз бор. Акт қилинганларни тушунса бўлади, аммо нима учун саволлар китоби йўқолган ёки йиртилган бўлса, бунинг жабрини абитуриент кўриши керак? Унинг нима айби бор? ДТМ ва унинг вакиллари шунга жавобгарми, марҳамат, улар жавоб берсин бунга. Ушбу қоидани қайта кўриб чиқиш керак;

? апелляцияда қуйидагиларга йўл қўйилмайди:
• уяли телефон, компьютер, телекоммуникация воситалари ва шпаргалкалар (луғат, жадваллар бундан мустасно) олиб киришга ҳаракат қилиш ёки олиб кириш;
• апелляция жараёнида тест материалларини бошқа абитуриентга узатиш, уларга ёрдам бериш ёки ёрдам олиш;
• тест топшириқлари китобининг варағини йиртиш.

Шу жойи ҳам тушунарсиз. Олиб кирса нима бўпти? У ўзининг ҳақлигини исботлаш учун керакли манбалардан қидирса, бунинг нимаси ёмон? Абитуриент гениймаску, ҳаммасини ёддан биладиган. Ахир бу шунчаки апелляция жараёни-ку, қайта тест топшириш эмас!

? абитуриент қабул қилган қарор устидан судга шикоят қилиши мумкин.

P.S.: умуман олганда апелляция тартиби фақат ДТМнинг фойдасини кўзлаб, абитуриентларни қийнаш учун ёзилганга ўхшайди. Худдики хатоси чиқиб қолишдан қўрқиб, атайин шунақа қийин жараённи яратишган, деб ўйлашга асос бор.

Апелляция жараёнлари очиқ ва ошкора, абитуриентлар учун барча эркинликлар ва шароитлар яратилган ҳолатда бўлиши керак. Худди қамоқхонага киргизиб, “қўлингдан келса, қочиб чиқиб кет” деган мазмунда эмас. Ўзбекларда “ошинг ҳалол бўлса, кўчада ич” деган нақл бор. Худди шунақа ДТМ ўзига ишонса, апелляция жараёнларини тўлиқ очиб ташлаши керак.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!