Берлинда Путин ва Меркель учрашуви. Қатъий музокаралар келишувсиз тугади
Россия президенти Владимир Путин ва Германия канцлери Ангела Меркель Берлин яқинида ўтган ва айтарли ривожланишсиз тугаган музокараларида Украина ва Суриядаги можаролар, Эрон масаласи ва АҚШнинг асабига тегаётган газ қувурини муҳокама этишди, деб ёзмоқда Рейтер.
Кремль матбуот котиби Дмитрий Песков журналистларга ҳеч қандай келишувга эришилмагани бироқ ушбу учрашув Путин ва Меркелнинг май ойида Сочида бўлиб ўтган учрашувидан сўнг «соатларини тўғрилаб олишлари» учун муҳим бўлганини айтиб ўтган.
Икки давлат ўртасидаги муносабатлар Россия 2014 йилда Қримни аннексия қилганидан сўнг таранглаша бошлаганди.
Икки етакчи «Шимолий Оқим-2» газ қувури Украина ва АҚШнинг қаршиликларига қарамасдан, соф тижорий лойиҳа эканлиги борасида фикр билдиришди, деган Песков.
«Шу сабабли уни (газ қувурини — таҳр.) эҳтимолий учинчи томоннинг рақобатга доир бўлмаган ва ноқонуний ҳужумларидан асраш чораларини кўриб, пировард натижада мазкур лойиҳани якунига етказишга эришишимиз даркор», — деган Песков журналистларга Путин музокаралардан сўнг Россияга учиб кетишидан бироз аввал.
Песков айнан қандай чоралар кўрилишига аниқлик киритмаган.
Музокаралар аввалида Меркель хоним Украина Европага газ транзит қилишда ўзининг етакчи ролини давом эттириши кераклигини таъкидлаб, мазкур масалада ЕИ, Украина ва Россия ўртасида мулоқот бошланганини олқишлаган.
Магдебургдаги ҳукумат қароргоҳида чиқиш қилиши асносида Путин буларнинг барчаси тижорат мақсадида амалга ошиши кераклигини айтиб ўтган.
«Асосийси, биз учун анъанавий бўлган Украина транзити иқтисодий талабларга жавоб бериши ва барча жабҳаларда иқтисодий маънога эга бўлиши керак», — деган Путин.
Америка Қўшма Штатлари Берлинга босим ўтказиб, Болтиқ денгизи тубидан ўтувчи қувур ётқизилишини тўхтатишга уринмоқда ва мазкур лойиҳа Германиянинг Россия энергия ташувчиларига қарам қилиб қўяди деган фикрни илгари сурмоқда.
Песков лойиҳада иштирок этаётган компанияларга Америка томонидан санкциялар жорий этилиши таҳдиди музокаралар чоғида муҳокама этилмаганини айтиб ўтган.
Музокаралар аввалида Путиннинг ёнида туриб баёнот берган Меркель хоним ҳар икки давлат, бироқ Россия БМТ Хавфсизлик Кенгашининг доимий аъзоси сифатида Украинада ва Сурияда жанговар ҳаракатларни тўхтатиши керак, деган фикрни билдирган.
У Путин билан суҳбат чоғида инсон ҳуқуқларига оид мураккаб масалани кўтаришни режалаштираётгани, икки томонлама муносабатларни муҳокама этишини айтиб ўтган.
Ҳар икки етакчи Суриядаги вазият ҳамда етти йиллик урушдан сўнг кўплаб қочқинларнинг оғир аҳволидан ташвишда эканлигини билдириб ўтишган.
Ангела Меркель Идлибдаги ва унга яқин ҳудудлардаги гуманитар инқирозни бартараф этиш муҳимлигини айтиб, Сочида май ойида бўлиб ўтган учрашувда Путин билан конституциявий ислоҳотлар ва эҳтимолли сайловлар мавзусида фикр алмашишганини таъкидлаган.
Путин журналистларга суриялик қочқинларнинг ўз ватанига қайтишлари учун барча ёрдам кўрсатилиши кераклиги, Сурияни тиклаш учун катта ёрдам зарурлигини айтиб ўтди.
Украина масаласида Меркель янги ўқув йили бошланиши арафасида Донбассдаги ажратувчи чизиқнинг икки томонидаги можаро иштирокчиларини тинчлантириш учун янги чоралар қабул қилинишидан умидвор эканлигини таъкидлаб ўтган.
Manba: kun. uz
