Байден АҚШни неча йил бошқара олади?
Жо Байден сайловларда юқори натижа кўрсатиб, Америка қўшма штатлари президентлигига жуда яқин тургани сабаб бир қанча дунё экспертлари томонидан унинг бошқаруви қандай бўлиши ва қанчага чўзилиши борасида тахминий фикрлар билдирилмоқда.
Россия Фанлар академиясининг Хавфсизликни ўрганиш маркази эксперти Константин Блохин “Известия” нашрига берган интервюсида Жо Байден агар сайловда ғалаба қозонса, биринчи президентлик муддати тугаганидан кейин 2025 йилда сиёсатни тарк этади, дея таъкидлади.
Унинг фикрига кўра, ёши ва соғлиғи билан боғлиқ муаммолар Байденга штатни бир муддатдан кўпроқ бошқаришига йўл қўймайди.
Байденнинг шифокори сиёсатчининг оёғида суяк синиши билан боғлиқ жароҳат борлигини қайд этган.
“Байден ҳукмронлигининг ҳақиқий сценарийси шундайки, соғлиғи туфайли Байден мамлакатни самарали бошқаролмайди. Бундай вазиятда Aмерикани Байден ғалаба қозонса вице-президент бўлиши кутилаётган Камала Харрис бошқаради”, дейди Константин Блохин.
Экспертнинг таъкидлашича, Байденнинг потенциал президентлиги Жорж Буш президентлигига жудаям ўхшайди, ўшанда ҳокимият вице-президент Дик Чейни ва унинг атрофидагиларнинг қўлида қолган эди. Aслида, Чейни AҚШнинг ташқи ва ички сиёсатини бошқарган.
Шу билан бирга, Блохин оёғидаги жароҳат Байденнинг AҚШ президенти бўлиш имкониятига таъсир қилмаслигига аминлигини ҳам таъкидлаган.
78 ёшли Жо Байден шу пайтгача давлат раҳбари этиб сайланган энг кекса президент бўлади. Унинг соғлиғи Трамп ва бошқа республикачилар томонидан бир неча бор муҳокама қилинган.
Жароҳат олганига қарамай, Байденнинг биринчи президентлик брифинги бугун, 30 ноябрь куни ташкил этилди.
Эслатиб ўтамиз, AҚШда президентлик сайловлари 3 ноябрь куни бўлиб ўтди. Aмериканинг етакчи оммавий ахборот воситалари ва демократлари Байденнинг ғалабасини аллақачон эълон қилишган. Мамлакатнинг амалдаги президенти, республикачи Дональд Трамп эса мағлубиятни қабул қилмади. У сайловларда ғолиб бўлганини бир неча бор эълон қилди, шунингдек, AҚШнинг бир қатор штатларидаги овозларни қайта санаб чиқишни талаб қилган.
Aмерика Қўшма Штатлари Президентини тўғридан-тўғри халқ сайламайди, лекин ҳар бирига сайловчиларнинг мутаносиб овози берилган штатлар томонидан сайланади. 3 ноябрь куни халқ овози билан уларнинг ваколатлари тасдиқланди. Ғалаба қозониш учун президентликка номзод 538 сайловчидан иборат коллеж аъзоларининг 270 овозини тўплаши керак. Декабрь ойида коллеж аъзолари ўз штатлари марказида йиғилиб, президентлик учун ўзларининг шахсий овозларини берадилар, бу эса янги давлат раҳбарини расман белгилайди.
Сайлов коллежи аъзолари 14 декабрь куни овоз беришлари керак. 2021 йил 6 январда Конгресснинг иккала палатасининг қўшма йиғилишида сайловчилар коллежидаги овоз бериш натижалари тасдиқланади ва 20 январь куни сайланган президентнинг ваколатини қабул қилиш маросими бўлиб ўтади.
