«Барселона» Мессисиз гол ура олишига ишоняптими?

«Барселона» Мессисиз гол ура олишига ишоняптими?

Испания нашрлари «Барселона» ҳужумчиси Лионель Мессининг жароҳат олгани юзасидан жамоа вакилларининг фикрларини чоп этмоқда.

Хусусан, бош мураббий Эрнесто Вальверденинг «Севилья»га қарши баҳсдан (4:2) сўнг етакчи шогирди сафдан чиққанига нисбатан билдирган муносабатини Football Espana маълум қилган.

«Мессининг жароҳати бизни бироз издан чиқарди, аммо ресурсларимиз етарли ва биз буни енгиб ўтишимиз керак. У иложи борича тезроқ соғайишига умид қиламиз. Унинг ўрни албатта билинади», - дея таъкидлаган Вальверде.

«Бу биз учун муҳим ўйин эди, ғалаба натижасида биринчи ўринга чиқиб олдик. Аксарият вақт давомида ўйинни биз назорат қилдик, шундай бўлса-да ҳатто ҳисоб 3:0 бўлиб турганда ҳам «Севилья» бизга босим ўтказишда давом этди.

Мессининг жароҳати? Биламиз, у сафимизда бўлганида бизга кўпроқ ишонч бағишлаб туради, ахир у жаҳондаги энг яхши футболчи. Лекин унинг йўқлиги бизга у қадар катта таъсир кўрсатмаслиги керак. Жамоа у билан ҳам, усиз ҳам олдинга қараб интилиши лозим», - деб айтган Пикедан иқтибос келтирди Mundo Deportivo.

«Леонинг йўқлигини иложи борича билдирмасликка ҳаракат қиламиз. «Севилья» билан ўйинлар мен учун доимо бошқача ўтади», - деган Андалусия клубининг собиқ аъзоси Иван Ракитич Marca мухбири билан суҳбатда.

«Биз Леосиз ҳам гол ура оламиз. Буни «Севилья»га қарши ўйинда ҳам кўрсатдик. Мен учун бу ўйин ўзига хос тарзда кечди, боиси собиқ жамоамга қарши тўп сурдим», - дея фикр билдирган Клеман Лангленинг сўзларини чоп этди «Барса» расмий сайти.

Эслатиб ўтамиз, Месси ўнг қўли тирсагидан олган жароҳати сабаб 3 ҳафта майдонга туша олмайди. Шу боис у Примеранинг навбатдаги тури доирасида 28 октябрь куни бўлиб ўтадиган «Реал»га қарши учрашувни ўтказиб юборади.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!